Jowai: Ka yung krehkaam ka Krishi Vigyan Kendra (KVK) Jaiñtia Hills kam chibynta i kynmoo warom yaka sngi yatylli ka ri namo ka National Unity Day, da pynman ko daka Webinar næ ka esikai lyngba ka Internet ya ki paaid warep yong ka ri-loom Jaiñtia wa kynthup nadooh i rukom rep jhoor tlang, i rukom rep tit, rukom ri syiar nalor ki Scheme waphær waphær yong ka sorkar.
Ya kani ka Webinar da pynman ynne ka sngi, kawa pynlai da u Dr. Rimiki Suchiang, SMS (AH & Vety). Da wai yaka da u Dr D. Pasweth, Senior Scientist & Head KVK Jaiñtia Hills, wei da yachim bynta lang hei puræ yei kular yong kani ka sngi yatylli ka ri (Rastriya Exta Diwas Pledge).
Heiyatoh wa i rukom rep jhoor tlang da e sikai daka Banylla Kharbamon, SMS (Horticulture) kawa da e yumut leh ya ki warep wow thung jhoor tlang ki ha yung deiwa tymmoh Plastic (Walk in Tunnel) yow yada nei dait thah. Da ong haroh ko wym hoi u e u sah chrah ki hali kba hadein wa dep ah kba, tangwa u pynemkaam won deiwa rep jhoor tlang.
Yei rukom rep tit won da e sikai da ka Risakaru Lyngdoh, SMS (Agronomy) heiwa da pynche ko yei emkaam hawa rep tit wei i myntoi wa ye u yoh neiwa rep tit.
U Dr. Rimiki Suchiang, SMS (AH & Vety) hawa e sikai yei rukom ri syiar, da kyntu u ya ki warep wow chim ki yei kaam ri syiar kam ka laad kamai yow pyndap yei emkaam ka yung khamtam naki pylleiñ wa i doh.
Katwa ka Alethea Dympep, SMS (Extension) da pynche ko hajrong ki Scheme waphær waphær ka sorkar Meghalaya wa ki warep ye ki u yoh myntoi. Da batai haroh ko chaphang ka Kisan Credit Card (KCC) Scheme kawa man ka Scheme kawa pynyoh ram (Loan) næ wa yarap poisa ya ki warep nalor ka Agriculture Infrastructure Scheme waka Micro Processing Unit Scheme.
Heijooh i por leh da pynche ko wa kammon u yoh ya kini ki Scheme. Neitæ da em leh ka ya pyllyu yumut hapyrdi ki warep wa ki Scientist yong ka KVK, kani ka Webinar da man ko leh i myntoi wa khroo ya ki warep ha kam ini i por wa em ka khlam COVID-19.
