Ka lehkmen yaka lyngkhooh snem thymme namo ka Khasi New Year Day da kynmoo yaka da ka yalang wa pynman ha Riti Academy, Jaiaw Langsning, Shillong heipor pyrdi synyaw ka 15 tarik.
Ya kani ka lehkmen da wan wow emlang da u Spiton Kharakor, u Herman Nongrum, u N Munish Singh wa kiwi heiwa da thang ya u dongmusa iwa da leh chwa da u Raphael Warjri, Chairman, Riti Aacdemy.
Ya ka sngi wa kheiñ yeiwa sdang u snem thymme toh deiwa kheiñ katkam wa mih wa sep u bnai iwa chong leh katkam wa sdang wa pyndep yaka rep ka riang iwa da thooh bniah da uwa thoh kot u Spiton Kharakor.
U Spiton da ong u leh wa kiwi ki jaitbru hapoh ka ri da em ki i yong ki hi i rukom kheiñ yei sdang u snem thymme wei toh kawa da myllien da ki warep ha ki jar jiar ki chnong tangwa ym jooh em kheiñ yaka kam kawa kyrpang hadooh ynnin u snem wei emkaam wow tip ki pateiñ wa hadien.
Da sñiawsih u leh wa ka Bri u Ynñiawtrep wa da ki spah ki hajar mer soodong ka khyndaw da dooh hi-eh kylleiñ ki thaw khappood neidaw wym tip ya u pood u ang pyn ha ka bri wa sah. Kamtæ da kyntu ya kiwa wan hadien wa toh u tip ki yaki thied, ki dustur riti yow neh i yong warim ki Khasi.
Neiliang u Herman Nongrum won da ong u wa e wa ha uni u snem thymme ka khlam kawa da wan ha kylleiñ ka pyrthai u yap noh ko wa wei i chait i khiah u wan biang i ha sla pyrthai.
Kiwi kiwi de wa e yei klam ha kani ka lehkmen yaka lyngkhooh snem thymme toh u N Munish Singh wa u Raphael Warjri, heiwa da chimbynta lang kiwi kiwi leh kiwa da em ha katai ka sngi.
