Shillong: Neidaw wa em kiwa yoh COVID -19 kamjooh wa em leh kiwa em hei maa wow yoh ya uni u khñiang wei da emkaam wow leh yei booddien ya kiwa em hei maa, wow leh yaki Test, i khangkset yow yada nei poor uni u khñiang, ka District Magistrate, East Khasi Hills District da pynmih hukum ko haka 16 tarik uni u bnai yow pynman Micro Containment Zone ya i thaw wa em yung ka Mihpli Dkhar ha Nongkhyriem, Nongthymmai, Block-V, i yung ka Saraswati Thapa (wa chong wai) ha i thaw ka Patricia Nongkynrih ha Ranab, Lower Lumparing, i yung ka Taffie Corelli Kharbuli ha Jaiaw Laitdom, i yung u Nangshanbor Nongkhlaw ha Jaiaw Lumbatemon wa i yung ka Iarilanglin Lyngdoh ha Jaiaw Lumsyntiew yow khang yei psiah i mih khlem da yoh bor cha kini ki thaw.
Ka hukum da khang ko ya kiwon kiwon wow psiah cha kini ki Containment Area wei kiwa em hapoh kini ki thaw wow neh bait ki hapoh yung.
Ki Incident Commander daw pait ki wa da bood thij yaka hukum, wei ya kiwa leh pyrchah daw pynchitom katkam ka aiñ Disaster Management Act, 2005 waka IPC.
Ha kawi won ka hukum, hadien wa dep leh yaka Contact Tracing, i Test ya kiwa em hei maa wei da yoh leh yaki Report, ka District Magistrate, East Khasi Hills District da pynmih hukum ko haka 16 tarik uni u bnai yow pyndam noh yaka hukum pynman Containment yaka mala Top Floor i yung ka Tobilda Kharchandi ha Oxford Hills, hajan Oxford Community Hall chisyndon.