U Daiar Sari uwa na ka chnong Mukhla, West Jaiñtia Hills District u tre wa haap poisa ha Yaw Chyiap, Jowai ynne ka 15 tarik da kyrpaad u ya kawi ka manbei wa jied yaka poisa yong oo lyngba ki sakhi wada yoo ha ka CCTV wow sñiawbha ko u pynuiñ cha oo deiwa Phone ha uni u Number- 6009986130.
Katkam i pyntip na u tre wa haap poisa, ong u wa ynne i sngi hadien wa dep chim poisa bai sñiang u ha Yaaw Chyiap mih liwan u lyngba kawi ka Gate khian yow lai chei thaw wa booh kari heipor chi waje duna, tangwa manda poi u ha kari chem u wa ka poisa wa rah u T. 90,000 da wiar ko.
Kamtæ hadien i pait lyngba ka CCTV wa em ha kani hi ka yaaw da yoo ya u Daiar Sari uwa sap sula rong soo mih u na katai ka Gate khian wei mar ya palat u da yoo ya kawi ka manbei wa bah khon da jied ko yaka poisa wa haap na oo wa da thap hapoh Plastic wei e ko ha kawi ka manbei wa chongdai pyn ha katai ka thaw.
Tangwa neiliang u tre pyntip u wa katai ka manbei wa bah khon da wan paan biang ko ya katai ka poisa wada e ksoh ko ha kawa chongdai heitai i thaw wa deiwa ong wa mut ko u pynkam cha ki tre wa wiar.
Wei heipor wa wan paan ko ya kani ka poisa da kylli chnong ki ka tangwa ym em khana ko, heiwa chi yoh biang ko yaka poisa yut wot ko wut-wut.
