Da lait im u khynnah wa chah rahbor cha Bangladesh na West Khasi Hills

Shillong: “Lym toh wa ri u Blai, ym tip de wa nga dang ye O u wow poi yung biang”, ong u Dajied Syiemlieh uwa lait im na tyrsim ki damok kiwa thmu wow chim noh yei mynsien yong oo hadien wa rahbor ki ya oo la 19 sngi.

Hawa yaklam u wa kiwa pathai khubor ynne ka sngi, u Dajied (18 snem) uwa na ka chnong Bynther, West Khasi Hills da pyntip u wa heipor wa em u ha ki kti ki runar, da kdoh da khoom ki ya oo wei da dat da choh ki oo man ka sngi.

U Dajied da chah rahbor u nadooh ka 27 tarik u Naitung (April) wei da yoh ki pulit ka Bangladesh u pyllait ya oo ha ka 15 tarik Naisan (May). Da poi u chapoh ka ri India ha ka 9 tarik uni u bnai.

Da pyntip wa heipor wa em u ha Umsur, kam u wa bood ya ka pooh chiloom, 6 ngut ki bru ki wym tipmit u da wan ki cha ka yung wa sah u deilang wa ki wait wa ka pistol wei da kit ki ya oo cha Bangladesh.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Katkam wa pyntip u Dajied, kini ki damok da emlang kiwa na Bangladesh wa ki Garo wa sah cha Bangladesh. Ki pulit hadien wa yoh ki u pyllait im ya oo na kawi ka thaw wa tip kam ka Jheinaigeti, kawa em ha Sherpur, Bangladesh da sumaar bha ki ya oo khlem pyndik, wei da booh ya oo ha Sherpur District Jail hadooh wa yoh u liwan yung.

Yei yoh u pyllait ya oo toh deiwa krehlang ki pulit ka South West Khasi Hills lyngba u SP, u Herbert G Lyngdoh wa u SP ka Sherpur, u Rafique Hasan Rahid.

Da pyntip u leh wa hadien wa rahbor ki damok ya oo da thmu wow tynyap noh ya oo neibhah wa ym yoh poisa ki katkam wa dawa na kiwa ha yung ha sem yong oo.

U pa yong oo u Rejoy Basaiawmoit da pyntip u wa kini ki damok da paan poisa ki chi klur wei hadien wa yaklam da pynhiar ki cha ka 50 lak tangwa hadien wa ong kiwa ha yung wa ym em poisa ki da pynhiar ki cha ka T. 10 lak wei kiwa ha yung da thooh laad ki wow pynpoi biang ya oo cha yung.

Ha ka sngi wa mut kiwa ha yung u su ya ka poisa, ki pulit da yoh ki u pyllait noh ya u Dajied wei ki pulit ka Bangladesh da kem ki leh ya uwi na kiwa rah bor ya oo.

Ya u Dajied da pynpoi ya oo cha India lyngba ka khappood na Dalu, West Garo Hills ha ka 9 tarik uni u bnai.

Neiliang kiwa ha yung ha sem da e khublei ki ya ki pulit ka Meghalaya, wa ki pulit ka Bangladesh wa waroh wa chim khia wow pynpoi yung biang ya u khon yong ki.

Also Read: La chi bnai wa lait u khynnah wa chah rahbor na SWKH tangwa dang neh u ha Bangladesh