15 49.0138 8.38624 1 1 4000 1 https://wyrta.com 300 0
Advertisement ad1

Da leh warom yaka World Population Day ha Khliehriat

0 Comments

Khliehriat: Ka World Population Day waka Awareness Programme on Tobacco use, Substance Misuse and Depression da pynman ya ka ynnin ka 11 tarik ha Jaintia Eastern College, East Jaintia Hills District, Khliehriat.

Ya kani ka yalang da pynman da ka yung krehkaam ka District Medical and Health Officer heiwa u Lasky Rymbai MDC, Tuber da man u kam u kongsan hei emlang u B. Kharmalki , Secretary, Drug Users Union of Meghalaya, Shillong, Dr. C. S Bareh, M&HO, Khliehriat CHC, DMHP, Khliehriat, ka R. Dhar, CHO, Khliehriat CHC, u P. Suchiang, DSP, East Jaintia Hills District, Khliehriat, u S. Marwein EAC, Khliehriat. Dr. P. Nongtdu, Principal, Jaintia Eastern College wa kiwi kiwi. Ki phang ha kani ka sngi toh “Adopting Family Planning for Maintaining Mother & Child Health” wa “Protecting the Youth and Promoting Welfare of the Youth.

U B. Kharmalki, Secretary, Drug Users Union of Meghalaya, Shillong hei klam yong oo hajrong i dih duma wa kiwi ki jait pynmuaid, da ong u wa i dih ya kini daw poi ko cha ka kyrni wei daw ktah ko ya i chait i khiah kamjooh ya kiwa yajan wa ki. Da ong u leh boon da poi ki cha kini ki kaam toh nei pynbor ki lok wei em ki por wa ki manbei manpa rap e poisa boon ki ya ki khon yong ki wei em won leh kiwa pynbood yongton ya i rukom im kiwa iwa da yah ya ki wow poi ki cha kini ki kaam.

Kamtæ da pynchlur u ya ki khynroo khyllood wow yait na kini ki jait dih wei wow pynlut por u pyrkhat ya ka puræ puthi yow yoh ki yaka mynried kawa tyrchain.

U Dr. C. S Bareh, M&HO, Khliehriat CHC, DMHP, Khliehriat hei klam yong oo da pynyoo u chaphang ka “Mental Health and Depression” wei da klam u chaphang kiwa boon ki jait wa chitom ha i pyrkhat pyrdain kam hawa yoh yei sñiawsih sñiawdiaw mynsieñ ki bru wa ya ki daw wa man kamni kawa ye leh u poi cha i dih ya i kiad wa kiwi ki jait dih pynmuaid hadooh wow pynkut ki yei mynsien yong ki.

Da ong u leh wa boon ki por, ki bru wa chitom kamni ym bien ki u yaklam yeiwa sñiaw ki wei kset ki chapoh iwa pynman ya ki Doctor wow chem chitom wow e yarap ya ki.

U kongsan u L. Rymbai MDC, Tuber hei klam yong oo da ong u wa i ku i boon bru ha pyrthai da wanrah ko yei boonjait i emkaam u bru iwa da wanrah kylla yei chah ktah ka rymaw wei da kylla i chit i kjam ka pyrthai.

Da ong u leh wa kam kani ka sngi toh kawa emkaam bha wow pynsñiawthooh ya kiwa khynroo khyllood chaphang i emkaam ka puræ puthi yow yait na ki kaam wa sih yow lait ki u man ka yukit wa khia ha yung ha sem wa kamjooh haka imlang sahlang.

Ka R. Dhar, CHO, Khliehriat CHC da klam ko kammon wow pynkhreh chwa wow sdang ya ka manyung kammon wow pyrkhat chwa katwon ngut u yoh khon wei kammon wow leh ya ini.

Neiliang u P. Suchiang, DSP, East Jaintia Hills District, Khliehriat hei klam yong oo da pynsñiaw u yei sñiawkhia yei sdang boon kiwa dih drug hapoh ka District iwa da yah leh cha ki kaam pyrchah aiñ kamtæ da pynchlur u ya ki khynroo khyllood wow yait ki na i drug, i kiad, duma wa kiwi ki kaam wa sih.

Ha chwa ini da em leh ka yalehke wa tbian wa leh da ki wakreh Anganwadi heiyatoh kammon wow pyndooh khon.

Advertisement ad1

0 Comments

Leave a Reply