Ka seiñ yong ki Nurse wa tip kam ka Trained Nurses Association of India, West Jaintia Hills Unit ynnin ka sngi da lehkmen ko ya ka Nurses Day ha Presbyterian Higher Secondary School, Modop, Nartiang hajrong ka phang “Our Nurses, Our future”. Kani ka sngi toh kawa lehkmen man-u-snem ha ka 12 tarik u Naisan kam chibynta wow pynyoo yei burom ya ki kaam wa da leh ki Nurse.
Ha kani ka sngi da emlang u Wailadmiki Shylla, MLA ka Jowai kam u kongsan waka Dr. A.M Paswet, District Nodal Officer, District Mental Health Programme kam ka symbood kongsan deilang wa u Dr. R. Pohsnem, Sr M.O, I/c Nartiang PHC.
Ya ka lehkmen da sdang deiwa thang ya ka charak da u kongsan wei da rwai yei sur namo ka Anthem ki Nurse hei yahkhmat ka I. Dhar, Assistant Nursing Superintendent Woodland W.K. Hospital, Sabahmuswang.
Neiliang u Wailad da yaroh wei da pynsñiaw u yei sñiawngooh ya ki Nurse kiwa da kreh chitom neibynta i bha i miat yong kiwi deiwa jied ya ini i jait kreh wa eh yow e mynsien ya kiwa kjut wa chitom.
Kamtæ da e mynsien u ya ki Nurse deiwa ong wa hanla i kreh yong ki man i iwa eh wa khia tangwa ymtoh u sangeh ki wow pynyoo yei dur wa kmen wei yei mynsien wa maya ya waroh kiwa emkaam yei sumaar sukhær.
Da ong u leh wa ka sorkar MDA da dep chim ko ki laad ki luti deiwa chimkhia yei kaam wa yatoh wa i chait i khiah wei da kular u wa oo man u uwa lait ha iwon iwon i por lada emkaam ka chnat yei yarap yong oo heiyatoh wow pynbiang yeiwa emkaam ki thaw sumaar.
Da khana u leh wa hapoh ka National Rural Health Mission daw wai ar tylli ki Urban Health Centre kawi ha Iawmusiang wa kawi won ha Mihmyntdu kawa daw man i kyrkhu ya ki paidbah.
Neiliang u Dr. R. Pohsnem hawa e yei klam da yaroh u yei kaam wa bha wa da leh da ki Nurse katwa ka Phiralin Kharongor, Associate Professor North Adventist College of Nursing da e ko ya ki kyntien wai phang hajrong ka phang yong kani ka sngi.
Neiliang ka Nurses Association da e ko leh ya ki tiar sahkynmoo cha ki Nurse kiwa da chongngiah kam i dak wow kynmoo burom ya ki kaam wa da leh ki.
Hachwa ini da yoh yei ktien pdiang burom na ka T. Lapasam, CHO Nartiang PHC wei da pynkut da ki kyntien e khublei na ka S.Suchaing, Ward I/c Jowai Civil Hospital Ialong wei da pynlai ya ka yalang da ka I. Pohktai PHN O/o DMHO, Jowai.
