Jowai: Deilang wa ka ri waroh kawi, ka Jowai Civil Hospital, Ialong ynne da lehkmen ko yaka Ayushman Bharat Day kawa tip leh kam ka National Health Protection Scheme haka yalang wa pynman ha pchem kani ka thaw sumaar heiwa da wan u Local MLA u Wailadmiki Shylla kam u kongsan.
U kongsan hei klam yong oo da pynchlur u ya ki paidbah wow chim kabu ya waroh ki Health Insurance Scheme kiwa da e da ka sorkar. Deiwa ong wa ka sorkar Meghalaya da yoo ko yeiwa emkaam wei da pynlut ko yei bor wow kreh neibynta i chait i khiah wei da sdang ko yaka Insurance Scheme hapoh ka jylla nadooh u snem 2012 da i thmu wow yarap poisa ya kiwa chah sumaar. Katni ka Megha Health Insurance Scheme–Phase IV da pynkrehkaam yaka deilang waka Ayushman Bharat-Pradhan Mantri Jan Arogya Yojna kawa da sdang da ka sorkar pyrdi kawa sdang ha u 23-09-19 yow su T. 5 Lak kawi ka manyung. Da pynkynmoo paidbah u leh wa da lehkmen ya kani ka sngi yow pynchlur ya ki paidbah ka District wow wan thap pyrtuid ki hapoh kani ka Scheme yow yoh myntoi ki heiwa ya i bai sumaar u bah khlieh da ki thaw sumaar.
Da yaroh u leh ya i kreh chitom ki Doctor wa ki Nurse hanlada chitom wa duna ki wakreh kamtæ da kyntu u ya ki paidbah wow ya krehlang wa kiwa pynlai ya ki Hospital wei wow pynman yaka ka thaw wa khooid.
Ha chwa ini, ka Dr. Rita Pohrmen, Medical Superintendent Jowai Civil Hospital ha i klam wai phang yong ka da pyntip ko wa kani ka sngi ha waroh ka ri da lehkmen ya ka yow pynsñiawthooh paidbah chaphang ki artylli ki Scheme Ayushman Bharat wa kynthup yaka Pradhan Mantri Health & Wellness Centre waka Pradhan Mantri-Jan Arogya Yojana kawa da pynkrehkaam lang hapoh ka MHIS.
Hawa klam chaphang ki myntoi ka Mega Health Scheme u Dr. K.N Lamare, Incharge ka MHIS Jowai Civil Hospital da pyntip u palat 9000 ngut kiwa da chah sumaar ha uni u snem heiwa 25% na ki toh kiwa kiwa da em pyrtuid du hapoh ka Jowai Civil Hospital. Wei kitu kiwa da em pyrtuid hapoh ka Hospital da boon kiwa da yoh myntoi. Da ong u leh ka yarap da e leh cha kitu kiwa ym em pyrtuid hapoh ka Hospital. Chooh chooh da pyntip u leh wa ka Jowai Civil Hospital da sumaar ko khlem poisa ya kitu kiwa yoh myntoi naka MHIS tangwa em hi kiwa jia wa daw hap pyuiñ poisa cha kiwa chah sumaar lada hap ki u lai leh Test cha baar ka Hospital kamwa da phah hi da ka Hospital, wei lada em ki bru wa kwah wow yoh yarap wow leh yaka Registration heiyatoh waka MHIS, ki paidbah ye ki wow psiah haka kamra Room No. 110.
U Philimon Bamon AB- PMJAY/MHIS da klam u chaphang ki myntoi wa yoh na kini ki Insurance Scheme wei da pyntip u leh wa hapoh ka District kamwa 67% ki paidbah da dep ki wow Register wei da yoh myntoi ki. Wei kitu ki wa sah ye ki wow Register hapoh ka Jowai Civil Hospital, ha yung krehkaam u District Medical & Health Officer, ki CHC wa PHC.
Ka Dr. H. Uriah da klam ko hajrong ka Health and Wellness Centre. Deiwa ong wa kini ki WHC da booh ha ki Primary Health Sub Centre, Urban Health Centre yow e ya i chakri wa bha chooh chooh cha ki paidbah.
Neiliang ka Dr. V.J Laloo da klam ko khajiak chaphang ka Poshan Maah deiwa khana chaphang ki jait baam wa emkaam u baam yow tei yei doh i pran.
Discussion about this post