Jowai: Ka West Jaiñtia Hills District deilang waka jylla waroh kawi da lehkmen ko yaka lyngkhooh snem wa 48 wa yoh yaka jylla Meghalaya daka yalang wa pynman ha District Library Auditorium, Mynthong, Jowai wa pynman daka yung krehkaam u Deputy Commissioner, West Jaiñtia Hills ynne ka sngi. U Thombor Shiwat, Chief Executive Member, Jaiñtia Hills Autonomous District Council da man u kam u kongsan he emlang u O. Lamin, MDC kam u symbood kongsan.
U Garod LSN Dykes, IAS, Deputy Commissioner, West Jaiñtia Hills, u Lakador Syiem, MPS, Superintendent of Police, WJHs, ka R.S. Manners, MCS, Additional Deputy Commissioner, ka D.D. Syngai waka B. Blah, Extra Assistant Commissioner, Jowai wa ki heh District da embynta lang ki ha kani ka sngi.
U Thombor Shiwat da kynmoo tympang u ya kiwa da yaleh wow pynyoh yaka jylla wa pura deiwa ong wa ym toh u hun du wow yoh yaka jylla wei kam ki tre jylla toh u em i ka kitkhlieh wow ya krehlang waka sorkar yow wanrah yaka roi ka paar hapoh ka jylla khamtam ha i liang ka puræ puthi waka chait ka khiah.
Da wai paidbah u leh yaka Online Service kawa ye ki paidbah wow pynemkaam yow panbor wow pynman ya ki yalang paidbah, ki tamasa wa i leh ya ka Registration of Marriage hapoh ka Special Marriage Act 1954.
U kongsan wa u DC da saam ki leh ya ki Certificate wa ka song poisa cha kiwa lai puræ ka District hapoh ka SMART Trust, cha u Daoo Teiki Maya Garod na North Liberty School, Jowai uwa yoh 88.50%, ka Pdiangmon Niang, Lummuroo Secondary, Shangpung kawa yoh 85% wa u Eddie Savio Rymbai, Marian Hill Higher Secondary School uwa yoh 84.66%.
Ha chwa ini, u Deputy Commissioner u Garod LSN Dykes da e u ya ki ktien pdiang sñiawbha deiwa khana leh ya ki kaam wa da pynkrehkaam ko sorkar yow wanrah yaka roi ka paar.
Ka I. Rymbai, District Informatics Officer da khana ko ya ki e-Service wa em wa ki paidbah ye ki wow pynemkaam. Wei ye ki leh wow pynemkaam ya kini deiwa lai cha ki Common Service Centres.
Yaka yalang da pynlai da ka B. Blah, MCS, Extra Assistant Commissioner, Jowai wei da yoh ya ki ktien e khublei naka R.S Manners, MCS, Assistant Deputy Commissioner, Jowai.
Discussion about this post