Jowai: Kamwa ha kylleiñ ki thaw yong ka ri da lehkmen yaka National Milk Day, kawa man leh kam chibynta ka sngi wow kynmoo warom yaka lyngkhooh sngikha u Dr. Verghese Kurien u pa yong ka ‘White Revolution’ ka ri India wa lyngba i prat luti yong oo, ka ri India da man ko kawa nyngkong hei pynmih dud haka pyrthai. Kamtæ ynne ka sngi neiliang ka yung krehkaam District AH & Veterinary Officer, West Jaiñtia Hills District leh da chim ko wow kynmoo warom wow lehkmen ya kani ka sngi haka yalang wada pynman ha Dairy Plant Mooralong, Jowai.
Ka thong yong kani ka sngi toh yow pynku yei yoh i kot wei u pynchlur ya ki warep, kiwa ri masi nalor wow pynsñiawthooh hajrong i emkaam wow dih dud khnang yow yoh yei chait i tram.
U B. Dkhar Senior Dairy Officer West Jaiñtia Hills District hawa klam yahkhmat da ong u, i dud man ko leh ka jait baam wa em boon dooh i jait wa tei yei doh i pran u bru, pynkhlan ko yei pran u bru khamtam ha kam kini ki por wa em ka khlam COVID-19, yarap bha ko u pynkhlan yei bor yaleh pyrchah i doh u bru wa kynthup leh nadooh ki chieñ ki lymmieñ.
Khana u wa neiliang ka sorkar leh da yaleh ko u wai yaka Meghalaya Milk Mission wei haka District leh da sdang yaka. Yooluti u wa dei yakreh lang ki warep daw ye u pynbiang dud yaka District kamjooh wot u dai cha kiwi won ki thaw.
Neiliang ka Dr. R.Bamon In-charge District AH & Veterinary Officer, ong ko wa i yarap kylliang man i iwa emkaam tam para warep, para wa ri masi, wei heijooh i por neiliang ka yung krehkaam e yarap ko leh heiyatoh wa ki dawai, ki Injection yaki masi yow yada yaki nei kjut, nalor wa kyntu ko leh ya kiwa sñiaw emkaam u yoh yutip wow lai limih ki cha ka Training Centre wa em ha Khliehtyrchi.
U kongsan yong kani ka sngi u L. Kynjing, ADC ka West Jaiñtia Hills chwa wow e u yei klam da saam u leh yaki khusnam cha kiwa jop haka yakob dro dur, thoh Essay wada pynman da kani ka yung krehkaam.
Ha kani ka jooh ka sngi hadien wa kut ka yalang ha Mooralong da lai lehkmen haroh ya kani ka sngi waki khonswet wa sah ha NEIMA Orphanage Home ha Sahsniang heiwa da saam dud haroh cha ki.
