Shillong: Ka Coordination Committee yong ka sorkar synrop Meghalaya Democratic Alliance (MDA) kawa man ynne ka sngi da rai wow pynkut noh ya i kawang ktieh, wei ki seiñ saiñ pyrthai u yakrehlang ki, ym toh dei u pynmih ya ki pynbaad cha baar, tangwa toh u pynsñiaw chwa cha ka Committee ya i eh wei lada ki chem ki wa ka Committee ym leh ko iyi iyi, ye ki wow pynsñiaw da kamwi won.
U Montri Rangbah ka jylla uwa man leh u Chairman ka Committee, u Conrad K Sangma da ong u ya ini hadien wa pyntip u wa ha ka yalang da yatai sani bha ya iwa pynbaad pyrchah da ka BJP kawa emlang ha ka sorkar.
Da pyntip u leh wa ka MDA ka chim ko wa i pynbaad ka BJP wa man i iwa em yurim, wei ha ka yalang da pynche ya waroh ki pynbaad toh du i klam yong ki kattu katni ngut ki bru. Hawa yatoh won wa i pynbaad baam tooh ha ki ar tylli ki Autonomous District Council (JHADC/GHADC) da ong u wa ka sorkar da dep ko wow thung ya ka kynhun takit.
Da pyntip u leh wa i yachem wa u National Vice President ka BJP wa toh u pait ya ka Party ha Meghalaya, u Dr. M Chuba Ao da pyntikna wa ka BJP u pteiñ ko wow yakrehlang waka sorkar MDA.
Ha kani ka yalang kiwa yahkhmat BJP kiwa da pynbaad bha ya ka sorkar, kitæ u President wa u Vice President, u Ernest Mawrie wa u Bernard Marak ym em poi ki, hawa kylli na u Montri Rangbah ya i wiar yong kini, da kyntait u wow pyntip ya i daw, tangwa da ong u wa waroh 2 ngut ki MLA ka Party ki em ki haka yalang wei itæ da biang.
Hawa yatoh wa i kylliang ya ki Montri na ka Party BJP, u Conrad da ong u wa chong ha i rai yong ka Party, wei i kylliang chuki wa da dep toh katkam i pynsñiaw ki seiñ wa emlang ha ka sorkar.
