Shillong: Ka Seng Khasi Kmie, ynne ka sngi nyngkong da pynman ko ya i lehkmen ya ka Seng Kutsnem hapyrdi bood ryntih ya ki kyndon yada COVID-19 deiwa sdang da i pynhær lama ha yung ka Seng Khasi, Mawkhar ha i por step ha i ya emlang ki waheh wa yahkhmat deilang wa ka leh-niam leh-rukom.
Rap hadien da em i lai paidbah deilang wa ksin ka bom nadooh Mawkhar hadooh Lympung Madan Weiking heiwa da bood ya ka prokram yalang deilang wa i ngooh i dem.
Ka Seng Kutsnem man ko leh wow pynyoo yaka dustur riti wa mahajon ka jaitbru Khasi kawa emlang ki khor ki khriam. Ha kani ka sngi ka Seng Khasi Kmie da ngooh Blai ko wa ka khlam ka ngoh COVID-19 u dooh noh ko wei daw wan biang i chait i khiah, i chong chngaaiñ chongsuk, i pahooh pahai, i ya maya yatylli khlem da mylliñ ya i akor burom.
Da yoh yutip wa ki chnat ka Seng Khasi ka Bri u Ynñiawtrep da pynman ki ya ki yalang lehkmen ya ka Seng Kutsnem deiwa pynhær lama Seng Khasi ha ki jar jiar ki skur wa ki yung Seng Khasi yong ki deilang i ngooh i dem neibhah wym ye u chimbynta lang da waroh.
Ha ka yalang ha Weiking, u Paiem Ainam Manik Syiem kam u kongsan da ong u wa i lehkmen leh-niam Seng Kut Snem toh wa pynyoo yei ya tylli kam ka jaitbru cha ka pyrthai, wei hapyrdi i kylla i por, i ngait wa skem bha ha jar jiar ki niam tynre dang man ko kawa chit rhem kam i diñ wa kop ha soodong i tpai diñ.
Da yaroh u yei ye ka Seng Khasi Bei wow pynman ya i lehkmen wa chongkun wot hapyrdi i eh na i daw ki kyndon kiwa hap bood pynrkhiñ wow yada na i poor ka khlam COVID-19.
Nalor u kongsan, kiwi de kiwa da e yei klam ha kani ka sngi kynthup ki ya u Rangbah Donkupar Dkhar, President ka Seng Khasi Bei, u Rangbah Paia B Synrem, Asst. Secretary, u Rangbah PD Nongrum, General Secretary wa kiwi kiwi de.
Ya ka lehkmen wa waroh chi sngi da pynyoo kamwa jia (Live) lyngba ka Facebook Page ka Seng Khasi Kmie khnang wa ki paidbah chong chnong ka jylla u yoh ki wow ya pait lang. Ha kani ka sngi da pynsñiaw leh ya ki rwai Seng Khasi kiwa yatoh wa ka Seng Kutsnem.
Kam wow kdaw heini wa i lehkmen Seng Kutsnem toh wow kynmoo warom ya ka sngi wa da seiñ ya ka Seng Khasi ha u snem 1899 da 16 ngut ki bru rangbah ha ka yalang ha Smit wow yakhun pyrchah ya i wan tyllep ki bor yong kiwi ha ka riti dustur, i ngait tynre wa kiwi kiwi.
Kini ki 16 ngut kynthup ki ya u Rash Mohon Roy Nongrum, Joshon Tariang, Chandranath Roy Dkhar, Said Sing Dkhar, Kupardon Dkhar, Ram Charan Dympep, Mohon Roy Rynjah, Robert Dkhar, Rubi Sing Swer, Rajin Shon Marbaniang, Borton Hynniewta, Nadon Roy Diengdoh, Raibon Singh, Ruton Muni War, Nalak Singh Iangblah wa u Indromuni Jyrwa.
Ha kani ka lehkmen ya ka Seng Kutsnem wa 121, ka Seng Khasi da pynkup burom ko leh ya ar ngut ki Doctor rangbah wa paawkhmat ha ka jylla, kitæ u Dr. Werlok Kharshiing wa u Dr. Rangsan Sing Thangkhiew ha ka yalang kawa da pynman ha Lympung Madan Weiking, Jaiaw.
U Dr. Werlok Kharshiing uwa man leh u bru rangbah uwa da noh kyllooid mynsien chiboon ha i chait i khiah deiwa seiñ boon tylli ki thaw sumaar wa ki thaw e dawai wei kamjooh ka skur puræ Nurse.
U Dr. Rangsan Sing Thangkhiew uwa man leh u President wa nyngkong dooh ka Indian Society of Gastroenterology (ISG), North East Chapter heiwa katni da ksoh u yaka kyrdan kam u Medical Director ka Supercare Hospital, Shillong.
