Shillong: U Lambor Malngiang u MLA wa MDC ka Nongkrem Constituency uwa man leh u Chairman ka State Planning Board ka sorkar jylla da phah u ya ka kyrwoh kitbok kitrwiang hajrong ka Shad Pomblang Syiem lane ka Shad Nongkrem kawa daw man ha ka 24 wa 25 tarik uni u bnai.
Deiwa e khublei ya ka Syiem ka Hima Khyrim, u Dr. Balajiedsing Syiem, ki Montri, ki Bakhraw Batri kamjooh ya ki khon ki hajar ka Hima, da ong u, “Nga phah O yei e khublei kitbok kitrwiang wa kani ka Shad Pomblang daw wanrah ko yei bha i miat, ka chong chngaaiñ chongsuk ha ka jylla waroh kawi”.
“Tangwa i em ka khlam COVID-19 ha uni u snem daw pynman ko ya ki khon ki hajar ka Hima Khyrim wa ki lok ki jar najan najngai wow dooh ya i laad wow wan sakhi ya ka kamwa da jooh man waroh chi kattu ki snem wei ym ye wow yoo ya i dur yong ka kamwa jooh ha man-u-snem”, da ong u.
“Tangwa ym toh wow dooh kyrmen, toh u pynchit pynkhlan ya idæ ya i mynsien maya yaka riti dustur, i ktien i thylliej, ka jaitbru wa ka burom ka akor”, da ong u deiwa kyntu ya kiwa chong chnong wow ya chimbynta lang.
“Kam uwa mihkhmat ka Nongkrem Constituency, nga e khublei kitbok kitrwiang O wa ka Shad Nongkrem daw yah ko cha i suk i kmen, kawa dap dei kyrkhu wow dap u kot, u dap dei khiah ya phi uwi pa uwi wei u duwai ha u Blai yow paan na oo wa i chongsuk chong chngaaiñ u synchaar ko ya ka ri wa maya yong i “, ong u MLA.