Ka District Water & Sanitation Mission, Jal Jeevan Mission, East Jaiñtia Hills District ynne ka sngi da lehkmen ko yaka World Water Day ha St. Anthony’s College Extension Auditorium, Byndihati, East Jaiñtia Hills District deiwa emlang u Montri ka chnat Social Welfare, Revenue and Disaster Management u Kyrmen Shylla kam u kongsan deilang wa u Abhilash Baranwal, Deputy Commissioner, East Jaiñtia Hills District kam u symbood kongsan.
U Paul Synnah, EE PHE Electrical Division Jowai uwa man leh kam u Member Secretary ka DWSM- JJM, East Jaiñtia Hills District hawa e yei klam yahkhmat da kyntu u yaki paidbah wow em ki i kitkhlieh neibynta u pynneh pynsah yaki um ki wah deiwa e nongmuna haroh u yei emkaam u thung ki dieñ ki siej yow im u neh ka um. Heijooh i por kyntu u wow pynlang leh yaka um slap.
Neiliang u Kyrmen Shylla hawa e yei klam da e khublei u yaka chnat PHE kamjooh ka sorkar bei, ka sorkar jylla wa lyngba i yakrehlang katni da boon ki top pynlang um wada chna haka District neibynta u pynpoi umdih yaki paidbah.
Ong haroh u wa lyngba i chynna jngai ka sorkar, ka chnat PHE da mang ko chiboon ki Scheme umbaam umdih haka District wa kynthup yaka Greater Rymbai Water Supply Scheme kawa dang lai chakhmat yow pyndep yaka, neite ka Synrang Umlawe Combined Water Supply Scheme, ka Ummyrho Combined Water Supply Scheme najrong kiwi tawan ki Scheme um wada pynkrehkaam haki chnong waphær waphær ka District lyngba ka Jal Jeevan Mission.
Neiliang u DC da ong u wa ki um changpæt man ki kiwa yarap bha hawa tngit ki um wa wan naki wah kamjooh leh hawa ym dap um.
Da ong haroh u wa toh u pyrkhat i wa i rukom leh yong i ktah bha ko yaki thaw wa mih ki um wot ki wym ye u yoo. Kamtæ i nongmuna wa khian watoh u leh toh deiwa thung boon ki dieñ neibhah ini yarap i wow pynneh pynsah yaki um, najrong wow kiar leh nei noh taroi yaki jhep chaki um ki liar.
Ha kani ka sngi u J.K. Singh, Estate Manager Star Cement Plant da e u yaka sikai hajrong ka phang Filtration of Water, neitæ da yoh i klam na u R. Nongtdu, SDO PHE Electrical Sub-Division Rymbai, u M. Passah, SDO PHE, RWS Khliehriat Sub-Division wa naka Miio Dkhar kawa naka chnong Cham Cham kawa da pynsñiaw heiyatoh i jop pynkrehkaam ka chnong yaki Scheme waphær waphær.
Da pynchongchit ya kani ka sngi dei rwai naka Gracious Disciple Group, i chaad tynre na ki wakreh ka PHE wa kiwi kiwi de.
Da saam yaki khusnaam cha kiwa jop haka yakob Exhibition waka Drawing najrong wa saam leh yaki Certificate e mynsien cha waroh ki skur wa chimbynta haki jait kaam waphær waphær wa pynman daka District Water & Sanitation Mission (DWSM)-Jal Jeevan Mission(JJM).
