Jowai: Ynne ka sngi ha Jowai da lehwarom yei dap 47 snem ka jylla ha District Library Auditorium, Mynthong, Jowai heiwa u Wailadmiki Shylla, MLA ka thaaiñ uwa man leh kam u Chairman ka Meghalaya Commission on Resource Mobilization da man u kam u kongsan hei emlang ka JMQ Lyngdoh, (Retd) Principal, Kiang Nangbah Government College, Jowai da man ko kam ka symbood kongsan hei emlang u Garod LSN Dykes, IAS, Deputy Commissioner, West Jaiñtia Hills, u Lakador Syiem, IPS, Superintendent of Police, WJH, ka R.S Manners, MCS, Additional Deputy Commissioner, ka YR Mawlong, MCS Extra Assistant Commissioner, Jowai wa kiwi kiwi.
Hawa e yei klam u Wailadmiki da kynmoo tamdien u ya ki waheh wasian deiwa kyntu leh ya ki paidbah ka District wow man ki kiwa chimkhia wei wow kyrchaan ya kiwa yahkhmat ka jylla neibynta ka mynried wa tyrchaaiñ. Da kyntu u leh ya ki sahep yong ki chnat sorkar wow pachat ki yei yumut yong ki wei wow kreh lang chirup wa ki wa mihkhmat paidbah.
Da pynrap u deiwa ong wa manda wanrah ya ki yumut ki buit chirup daw ye wow wanrah ya itæ i kylla.
Ha kani ka sngi ka Dr. E. Challam, Additional District Medical and Health Officer da e ko ya i klam hajrong i thong wa ki kaamram wa da leh lyngba ka Rashtrya Kishore Swasthya Karyakram (RKSK) wa i pynkrehkaam ya ka hapoh ka District. Da pyntip ko leh wa k RKSK da pynkrehkaam ya ka hapoh District ha u 2015 heiwa waroh le tylli ki block wa kynthup ya ka Amlarem, Laskein wa Thadlaskein C&RD da ye ki wow thung ya ki Block Counsellors wa ki District Level ya kiwa pait da ki Nodal Officer yong kani ka proramme.
Da pyntip ko leh wa kam chibynta yong ka RKSK programme da wanrah ya ki Friendly Health Clinic ha waroh ki Health Centres ka District wow pait ya ki khai khynroo khyllood. Da pyntip ko leh wa hapoh kani ka programme da jied ya ki soo ngut na kawi ka chnong wow man kam ki Peer Educator wa kynthup ya ar ngut ki kynthai wa ki chynrang, ar ngut kiwa lai skur wa ar ngut kiwa ym em de lai skur kiwa daw chah sikai ha ki ANM hajrong kammon wow pynclur ya ki khynroo khyllood wow lai ki chaphrang wow yoh ki ka mynried wa tyrchaaiñ. Hadooh ynne ka sngi da jied 644 ngut ki Peer Educator heiwa da jied 234 ngut na Amlarem Block, 176 ngut na Laskein Block wa 234 ngut na Thadlaskein Block. Da pyntip ko leh wa kam chibynta yong ka Rashtrya Kishore Swasthya Karyakram (RKSK) kawa san snem hapoh jylla, chi bnai daw lehwarom ya ka kawa da sdang nadooh ka 14 tarik uni u bnai hadooh 14 tarik u bnai wow wan hajrong ka phang “The future is here, Act now.”
Discussion about this post