Ynne ka sngi da lehwarom ya ka World Red Cross Day hajrong ka phang “Be Humankind” ha Raj Bhavan, Shillong heiwa u Lat ka jylla, u Satya Pal Malik uwa man u President ka Indian Red Cross Society, Meghalaya da man u kam u kongsan.
U Lat hawa e i klam da ong u wa ka Red Cross toh kawa rim dooh ka seiñ kawa kreh ya i bha i miat ki paidbah deiwa kyntu leh ya ki bru wow yarap ya ka Red Cross ha ki kaam yong ka.
Da yaroh u leh ya ka Meghalaya Red Cross Society hajrong ki kaam yong ka heipor wa wan ka kjut khlam COVID-19 deiwa kyntu ya ki paidbah ka jylla wow chim kabu na ki esikai ka seiñ yow man kiwa da pynkhreh lada jia iwon iwon kam hawa pynyoo bor ka rymaw.
Ha kani ka sngi u lat da pynlait u leh ya ka lama ka Red Cross wei da saam u ya ki Certificate cha ki Life Members wa thymme ka Red Cross Society ka jylla.
Kam wow kdaw heini, ka World Red Cross Day da tip leh ya ka kam ka World Red Cross wa Red Crescent Day, wei da lehwarom ya ka khlieh u snem ha ka 8 tarik uni u bnai wow kynmoo ya ka sngikha u Henri Dunant na Switzerland uwa da yarap sdang ya ka International Committee of the Red Cross, wei da pdiang ya ka ha ka Geneva Conventions.
