Ynne ka sngi, ka Mutong Tourism Promotion & Environment Development Society, East Jaiñtia Hills da pynman ko ya ka lehwarom World Tourism Day ha Kchaaid Moopun, Mutong heiwa u MLA ka thaaiñ uwa man leh u Montri ka sorkar jylla, u Kyrmen Shylla da man u kam u kongsan.
Ya ka yalang ynne ka sngi da pynlai da u H. Phawa uwa man u President ka seiñ heiwa u Secretary ka seiñ da khana u ya ki kaam wa da leh da ka seiñ.
Neiliang u Secretary ka 5 Chnong Welfare Association da khana u ya ki thaw wa em ha ka thaaiñ kam ka Cham Cham, ka Moopun, Sahksaw, ka Kchaaid Latang wa kiwi kiwi deiwa kyntu u ya u Montri wow pynchna ya ki sarok wow lai cha kini ki chnong ki thaw wa kiwi kiwi.
Da khana u leh ya ki kaam wa da leh ha ki chnong kam ka Plastic Festival wow pynkhooid ya ki Plastic deiwa kyntu ya ki paidbah wow krehlang wow wanrah ya i khooid i jngiar khnang wa kani ka thaw ha kawi ka sngi u man ko kawa bna naam.
U P. Nongtdu uwa man u Principal ka Jaiñtia Eastern College, Khliehriat hawa e yei klam da ong u wa i em ki thaw uiñke suwari daw wailaad ko wow yoh khih yoh kreh ki bru heiwa ka sorkar da pynchlur ko ya Inclusive Growth deiwa e nongmuna ya ka Umiam heiwa boon kiwa im na kani ka thaw deiwa chong wai dukan dai kwai wa kiwi kiwi.
Kam u kongsan ha kani ka sngi, u Kyyrmen Shylla da ong u wa u Montri Rangbah ka jylla, u Conrad Sangma da ong u wa nei wan ka khlam, ki kaam uiñke ki wow chah ktah nyngkong wei kawa khaddooh wow khai-im biang.
Da ong u wa ynne wot neiliang u Montri Rangbahdooh ka ri da ong u wa i chim tika toh iwa emkaam neibhah wa ki bru chngaaiñ ki wow lai cha ki thaw wa ki chnong kiwa dadep chim tika yada COVID-19.
Heijooh i por da kyntu u ya ki paidbah wa ymtoh u man ki kiwa sarom heiwa lada toh u sdang ya ki Homestay heiwa ye u tyrwa da ki baam wa baam ki bru cheini kam ki yanem, sla syllah wa kiwi kiwi neibhah wa boonsien kiwa uiñke suwari ka-it ki u maad ya ki baam wa boonjait.
Kiwi kiwa da klam ha kani ka sngi toh u BDO ka Khliehriat, u Secretary Chnong Mutong wa kiwi kiwi.
Ya kani ka sngi da pynphooh da ki chaad wa i pynyoo rong da ka East Jaiñtia Hills Wushu Association wei hei step da em ka yakob Plugging Run, Marathon wa kiwi kiwi.
