U Montri Rangbah ka jylla, u Conrad K Sangma da ong u wa i kylliang kaam ya ki Montri ka sorkar toh hadien wa da bichaar ya i emkaam wa ya i man i long ha ka jylla khamtam ha ki kattu katni ki chnat wow pynbha chooh chooh ya ki rukom krehkaam yong ki, tangwa heiyatoh wa ka chnat ki kaam pohyung da ong u wa toh ka chnat kawa rap khia wei emkaam wow pteiñ bait da u jooh u Montri neibhah emkaam ko yei booddien chirup wa ki pulit.
Chooh chooh da ong u wa i pteiñ wow pynneh ya ka kaam pohyung daw ye leh wow pynneh ya i chongsuk ha ka jylla wei ka wow khoom leh ya kiwon kiwon ki jia wow wan ha ki sngi wow wan.
Ka sorkar Meghalaya Democratic Alliance (MDA) dang ha kini ki sngi wa dadep da kylliang ko ya ki 4 ngut ki Montri wa kynthup ya u Prestone Tynsong uwa da chimkti noh ya ka chnat Bordiñ na u James PK Sangma uwa da yoh ya ka chnat i chait i khiah, wei u Sniawbahlang Dhar da ekti leh wow pait u ya ka chnat uiñke suwari, katwa ya u Dasakhiatbha Lamare da ekti ya ka chnat Transport, katwa ya u Lahkmen Rymbui uwa da phah tyrwa pynlait noh ya ka chnat ki kaam Pohyung ym em u pdiang ya ka.
