Jowai: Kiwa kreh kam ki Muster Roll hapoh ha ka P.W.D. (Road) South Division, Jowai da khñium ki neidaw wa ympu em yoh nongsngi ki kattu la kamwa ynru bnai lynter nadooh u Kmaichonglad (December) 2016 hadooh u Naisan (May) 2017 nalor wa ka nongsngi wa yoh ki man ko kawa khian bha.
“Ini i leh ka sorkar da ktah joor i ya ki Muster Roll kiwa em ha kani ka division neibhah hei sakhiat ki Muster Roll toh kiwa khih mylla sngi kiwa yoh nongsngi wa duna dooh lada wyrchaw wa kiwi wei man ki kiwa kreh wa khia kaam bha neidaw wa haap pykhooid ki ya ki jhep, ki tngit wa kiwi kiwi” da ong ka R.Passah kawa man kam ka General Secretary ka Muster Roll Workers’ Union- Jainti Hills District (MRWU-JHD).
Da ong ka seiñ wa ini i wym burom ka sorkar ya ki da che chwa wei i chah lehbeiñ yong ki daw ktah joor ko ya ki paidbah.
Ka seiñ da ong chooh chooh ko wa ini i pynslem wow su ya ka nongsngi yong ki da pynbor ko ya kiwa boon wow thooh wei wow chim ram ki khnang wow psa khon wei wow phah skur ki ya ki khon yong ki.
“Da jooh pynsñiaw i ya i eh i khoo wa yachem i cha ka sorkar tangwa man i iwa sepia neibhah wa ym em u leh ko iwon iwon leh hei yatoh wa ini” da ong ka seiñ.
Ka seiñ da pynsñiaw chooh chooh ko yei wym pynkreh ka sorkar ya ka ‘Meghalaya Regular and Casual Workers Scheme 1996’ kawa ye u pynskem namo u Regularize ya ki Muster Roll kiwa da kreh palat 10 snem chaneiñ heiwa daw yoh yarap ki ha kiwa boon rukom.
Kamtæ ka seiñ da kyrpaad ko ya ka sorkar wow chimkhia yeini wow pyllait noh ya ka nongsngi yong ki khnang wow yoh ki yei hok i yong ki.
Discussion about this post