Jowai: Ka seiñ JSU-1 hei emlang ka JSU-1 Thadlaskein Circle wa ka JSU-1 Lapangap Unit da pynsñiaw ki yei mynsien wa khia hawa yoh ujor ki na ki paidbah wym biang i em Doctor heipor wa lai thooh dawai ki na ka PHC Namdong.
Hadien ini ka seiñ chirup wa ki tnat da lai pait ko da ki khmat ya ka Namdong PHC ha ka 3 tarik uni u bnai heipor 2:15 nohchariñ sngi heiwa da chem sakhiat ko yeini i duna kani ka thaw sumaar.
Ha ini i lai pait da chem wa ym em bru wa kreh hapoh kani ka thaw sumaar wei hadien kattu katni por da wan ki nurse wa uwi u chowkidar.
Lada kamni wa ym em nurse, doctor wa kiwa e dawai ha pharmacy kammon u leh kiwa kjut kiwa lai thooh dawai na kani ka thaw sumaar? Da kylli ka seiñ.
Hei yatoh wa ini ynnin ka 5 tarik ka seiñ da lai yachem ko ya u Joint Director ka Director Health Service u Dr. A. War ha Office DHS Shillong wei neiliang yong oo da kular u wow chimkhia yeini wei wow leh yeiwa emkaam hei yatoh wa kani ka thaw sumaar kamjooh leh yong ka Nongtalang CHC heiwa uwa kreh yong ka kam u L.D. ym jooh wan kreh u heipor wa biang.
Ynne won ka seiñ da lai e dorkhat ko neibynta ka Namdong PHC wa ka Joint Director (MI) Dr. Buam.
Discussion about this post