Jowai : Ka seiñ West Jaiñtia National Council (WJNC) Central Body, da pynsñiaw ko yei mynsien wakhia hadien wa chah pynngat kyndon wa khlem nongrim ki pulit ka East Jaiñtia Hills District ya u Sambormi Lyngdoh uwa man kam u Chairman ka East wa West Jaiñtia National Council ha 9 Naiynñiaw 2016.
Kam wow pynkynmoo da kem ya uni u khlieh ka Council da ki pulit ka Lad-Rymbai, Police Out Post, hadien wa yoh ujor na u Superintendent of Police (SP) ka East Jaiñtia Hills District, hajrong i kynnoh wa uni u wa yahkhmat ka seiñ emkti u wa ka Hynniewtrep National Librtion Council (HNLC).
Hadien wa chah kem uni u khynroo ka JNC, neiliang ka WJNC da man ko kawa yaichah hadooh chibnai tam wei da chaniah ya i rukom kreh wei takit ki bor pulit hei yatoh weini, neibhah ka seiñ kwah ko yei che wei iwa sakhiat hei yatoh wa waroh ini.
“Tangwa lada kyruiñ yei thmu ki pulit wow pynngat ya uni u khynroo ha ki kyndon waphær waphær ya uni uwa yahkhmat ya ka seiñ JNC yoosar lakam wa thmu ka tnat pulit toh wow pyntieñ ya kiwi tawan ki dkhot ka seiñ” da ong u Lasinme Syad, Genral Secretary, WJNC.
Ka seiñ da ong ko wa i kynnoh ki pulit wa u chairman ka JNC, emkti u wa ka HNLC toh du wow tlep ait miaw yei tlot ka tnat waroh kawi.
Ki bor District ymtoh u chim kabu ki yei suki wei yaichah ka seiñ neibhah wa da toh i por wa ka tnat pulit u pynbait noh ko yei bakla waroh iwa mih neini wei wow pyndam noh ya ki kyndon wa pynngat ya uni u khynroo kamjooh leh ya uwa yakhmat ka seiñ JSM wa ar ngut kiwi kiwa da chah kem ha katai ka sngi.
Discussion about this post