Ka sorkar jylla da phah chithi ko cha u Montri ki Kaam Pohyung ka ri, u Amit Shah wei dang yang na ka Home Ministry neibynta i wan u Montri kamwa da kular u wow wan ha uni u bnai ha nongbah Shillong wow yaklam bniah hajrong ini i dawa pynkrehkaam ya ka Inner Line Permit (ILP) ha ka jylla Meghalaya.
U Symbood Montri Rangbah ka jylla, u Prestone Tynsong ynne ka sngi da ong u wa u Amit Shah da dep klam che u wa daw wan u cha Shillong, wei neiliang u Montri Rangbah ka jylla, u Conrad K Sangma da phah u da ka chithi cha u Montri ka sorkar pyrdi kam wow pynkynmoo yeiwa da kular u.
U Prestone da ong u wa ha kini ki kajiak sngi neiliang ka sorkar da pyrchang ko wow yachem ya u Amit Shah ha Delhi, tangwa neidaw wa em u cha baar, neiliang u Montri Rangbah ka jylla da phah noh u da ka chithi khnang wa ka sorkar u sñiawthooh ko khnang wow pyntip ya ki seiñbhalang.
Kam wow pynkynmoo heini, u Amit Shah da wan u ha Shillong ha ka 23 Duyatra neibynta ka Plenary Meeting yong ka NEC, wei ha kani ka sngi ym em u klam u wa kiwon kiwon ki seiñ heiyatoh wa ka ILP tangwa u Conrad K Sangma da pyntip u wa u Amit Shah da khut yaklam u ya ka sorkar wa ya ki seiñbhalang cha Delhi wow yaklam yillu bha hajrong ka ILP ha Meghalaya.
Ha u Thohlakhmi u Montri Rangbah ka jylla, da ong u wa u Amit Shah daw wan biang u cha nongbah Shillong ha uni u bnai wei daw sah u 2 sngi wow yachem lut ya kiwa kitkaam wow yaklam hajrong ka ILP.