Jowai: U District Magistrate, West Jaiñtia Hills District, Jowai ynne ka 14 tarik da pynmih hukum u wow krehkaam biang ka kyndon 144 Cr.PC deiwa pteiñ ya ka NIGHT CURFEW nadooh ka 14 tarik uni u bnai nadooh 9:00 i miet hadooh 5:00 i step man ka sngi.
Yeini da leh kam chibynta yong i yakhun pyrchah ya ka khlam u COVID-19.
Kani ka Curfew ym krehkaam ko ya ki bor pulit, ki chipai, ki bru wa kreh ha i chait i khiah, dukan dai dawai, PWD, kiwa kreh ha i saam bordiñ wa kiwi kiwi katwa ya ki Online Food Delivery da pynlait hadooh 10:00 i miet.
Kani ka kyndon ym krehkaam ko ya i kreh wa ymhoi u dam namo sangeh kam ha i chait i khiah, thaw sumaar, thaw e dawai (Clinic), Veterinary Clinic wa Laboratory kiwa yatoh wa ka chnat i chait i khiah, ki sahep wa em kreh (Duty) ha ki Corona Care Center, Information and Public Relations Department, National Highway and Infrastructure Development Corporation Limited (NHIDCL) .
Chooh chooh kani ka hukum ym kreh ko neibynta ki kari wa rah wa kit ya ki mar wa emkaam (Essential Goods), ki pulit wa ki chipai sonteri, kiwa kit dawai wa ki dukan chna truck ha ki sarokbah.
Heijooh i por ya kiwa yah truck wa kiwa yarap wa ki (Drivers and attendant) emkaam wow leh ki ya i sylli (Medical Screening) katkam ki kyndon ka sorkar.
Da pyntip leh wa ya ki CURFEW PASS neibynta i por wa krehkaam ka Curfew (9:00 i miet hadooh 5:00 i step) nadooh ka 14 tarik uni u bnai ye wow leh Online deiwa pyndap pyrtuid ha ka www.megedistrict.gov.in wa westjaintiahills.gov.in.