U SDO ka Amlarem Sub-Division da pyntip u wa hadien wa em kiwa yoh COVID-19 ini wa dep wei da em leh kiwa yachem wa kiwa yoh ya uni u khñiang ha ki thaaiñ Shnongpdeng, Darrang, Kongwang, Lymba, Dawki wa Bakur kamtæ da emkaam wow booddien ya ki, u leh ya i Quarantine, ki Test kamjooh wow khang kset yei poor uni u khñiang.
Kamtæ u SDO da pynbna Containment Area u ya ki thaw wa haap hapoh ka Shnongpdeng, Darrang, Kongwang, Dawki, Bakur wa ki Entry Point kitæ ka sarok Dawki Amlarem Jowai Road hadooh Shnongpdeng, ka Dawki Boating Point, ka Dawki PHC hadooh ha Tamabil Junction ki wow man kam ki Containment Area yow khang yei psiah i mih khlem da yoh bor nadooh ka pyrdi synyaw ka 14 tarik uni u bnai hadooh wa pynbna da kamwi tawan.
Ki bru wa em cha baar ki Containment Area ym chah ya ki wow psiah ki chapoh kini ki thaw wei kiwa em hapoh ki Containment Area ym toh wow mih ki cha lait ki yung wa sah ki.
Da khang wow pynman ya kiwon kiwon ki yalang hapoh ki Containment Area, u wai ya ki dukan lane kiwon ki yung krehkaam kiwa hap wow khang chisyndon nadooh ki yong sorkar wa ki yong ki bru samen.
Ya ki mar wa emkaam hadooh ki dawai daw yarap pynyoh da ka yung krehkaam u SDO (Supply), Amlarem.
Tangwa ya ki kari wa khayi wa ka Bangladesh lyngba ka Land Customs Station, Tamabil u pteiñ ki wow krehkaam heiwa ki tre kari lane kiwa yah kari toh u pyntikna ki wa ym pynyieñ kari ha ki thaw wa em chajan ki Containment Area deiwa lai bait sak cha khappood khlem sangeh heiwon heiwon.
I krehkaam ka yung krehkaam u Superintendent of Customs, Land Customs Station, Tamabil ha kini ki por u kheiñ ya ki kam ki kaam wym hoi u dam (Essential Service).
Ya kiwi won ki jait kari kiwa wan na baar ki Containment Area u lai u wan ki kamwa jooh khlem da sangeh ha ki thaw wa em ki Containment Area.
Kani ka hukum ym em khang ko ya ki wakreh hei chait i khiah wow leh ki yei kaam yong ki, ki wakreh ka Supply Branch u SDO (Supply) Amlarem wa kiwi ki bru sorkar kiwa kreh yow pynpoi ya kiwa emkaam ki paidbah, kamjooh ki laad pathai khubor, ki Petrol Pump wa kiwa libooh tadong LPG.