U District Magistrate ka East Jaiñtia Hills District da pynmih hukum u ynne ka sngi yow pynman Containment Zone ya ki 6 tylli ki chnong hapoh ka District nadooh myntu i pyrdi synyaw ka 21 tarik hadooh 6 waje i step ka 25 tarik uni u bnai.
Haka hukum da ong wa da leh ya ini kam chibynta wow yada nei poor ka khlam COVID-19 hapoh ka District hadien wa da em sa 2 ngut kiwa yoh COVID-19 heiwa 1 toh na Khliehriat East wa 1 na Khliehriat West heiwa uwi na kini toh uwa lai na Mookympad cha Khliehriat dei langær.
Kamtæ neiliang ka chnat Health & Family Welfare Department da kyntu ko wow pynbna ya ki 6 tylli ki chnong kam ki Containment Area kiwa kynthup yaka Khliehriat East, Khliehriat West, Dkhiah East, Deinchynrum, Sookilo wa Mookympad yow ye u leh yaka booddien namo ka Contact Tracing kamjooh yow leh yaka RT-PCR Test ya waroh kiwa em hei maa namo ki High Risk Contact kamjooh ya kitu kiwa ym em ware hei maa.
Kamtæ da pynbna ya kini ki chnong haneiñ kam ki Containment Area yow khang yei lai yei wan kiwa khlem yoh bor.
Ym chah ya kiwon kiwon wow psiah cha kini ki chnong, wei kiwa em hapoh kini ki chnong toh wow chong ki khop hapoh yung, ym chah wow pynman ya kiwon kiwon ki yalang, waroh ki yung krehkaam ka sorkar, ki bru samen wa em ha kini ki chnong u man ki kiwa khang kamjooh ki dukan hadooh wa pynmih hukum da kamwi.
Kiwa lait na kani ka hukum toh ki wakreh ka yung krehkaam u Deputy Commissioner kiwa em yaka Car Pass kiwa ye u psiah chapoh u pood u ang kani ka yung krehkaam, da pynlait leh yaka yung krehkaam ka DRDA, BDO, DIPR, MePDCL, PHE, ki Canteen ka yung krehkaam warim u DC, ka NH-6 wow krehkaam ki kaam wa ym hoi u dam, Emergency Service, District Contact Teams, CHC, PHC Khliehriat, ki Medical Officers wa ki Medical Frontline Workers.
