15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Pteiñ u Ribait Phawa wow wanrah naam ya ka Ri-loom Jaiñtia

Advertisement ad1
Advertisement ad1

Jowai: Hadien wa u Ribait Phawa da wan mihkhmat u ya ka jylla cha ka Indian Space Research Organisation (ISRO) wow sakhi ya ka Mission Chandrayaan-2 heiwa ka ri da thmu ko wow yooh kjat ha u Bnai chirup wa da wan sakhi leh u montri rangbahdooh ka ri, u Narendra Modi. Ha kani ka kynti won u Ribait da wanrah naam biang u ya ka Ri-loom Jaiñtia deiwa yoh ya ka kyrdan wa 12 ha ka Result SSLC wa pynbna daka MBOSE. 

U Ribait toh uwa puræ ha ka skur R.K.Mission Higher Secondary School Cherrapunji, wei da yoh u hadooh 5 tylli ki Distinction wei hawa yaklam wa oo da ong u wa ym em poi pyrkhat u wow yoh yeini i kyrdan neibhah ym em ware u yohlaad u wow pynkhreh ya ka Exam.

U Ribait da pyntip u wa chwa wow thoh ya ka Exam, u pa yong oo da em u hapyrdi i chitom wa joor wei du hadien kattu katni por da khlaad noh u ha u Thohlakhmi (February) wei neini da sah u ha chnong (Tuber Kmaichnong) kamwa chi tayaw khlem ki kot ki sla khlem khreh-kot wei hadien ini da liwan u cha skur wow pynkhreh ya ka Exam wei da yaleh u katwa ye wow mylliñ yeiwa jia wei wow poi cha ka thong i jop ha kani ka Exam (SSLC).

Heiyatoh wa i rukom puræ yong oo wow poi cha kani ka thong, neiliang u Ribait da ong u wa i daw wa poi u cha kani ka thong toh wa da mylien u wow khreh-kot man ka sngi waroh chi snem khlem pynyang yeiwon iwon deiwa pynrap u leh wa da bood ryntih u ya i por wow khreh-kot u wei wow sñiawthooh yeiwa puræ u dei yarap leh kiwa sikai yong oo neipor cheipor. 

Neiliang u Ribait da jooh rahnaam u leh ha ki yakob wa boonjait wei hajrong kini waroh da ong u wa kam u khynnah jooh sñiawsuk u wow chimbynta ha ki yakob waphær waphær wei hanla ym man u uwa jop tangwa iwa kongsan hi toh wa man u uwa chimbynta ha kini ki yakob. 

Chooh chooh da pyntip u leh wa ha ka yakob Space Quiz wa pynman da ka Indian Space Research Organization (ISRO) ha u snem wa dadep da man u uwa kreh chitom, deiwa puræ ya ki kot wa boon jait deiwa lai cha ki Library wei deiwa pynemkaam ya ka Internet wei neini da chah jied u wow lai chimbynta wow sakhi ya ka Mission Chandrayaan-2 ka India wow hiar ha u Bnai. 

Da pyntip u leh wa nadooh wa sdang u wow Download wei wow pynemkaam ya ka My Govt App da man u kam uwi na ki Active Participant deiwa chimbynta ha ki Quiz ka chnat Tourism, Digital India, Anti Drugs wa kiwi kiwi. 

Katkam wa man katni, neiliang ini i chlur mynsien u Ribait da kam u wa ym em de u tieñ u wow embynta ha ki rynsan paidbah namo wow embynta ha kiwon kiwon ki kaam paidbah.

Neiliang ka Bei u Ribait, ka Tee Phawa da ong ko wa na waroh ki 7 ngut ki khon yong ka, da yooluti bha ko wa u Ribait u rah u yei naam ka yung neibhah nadooh dang khian da em u yei sap wei da chaniah ko ha u Blai Trekirot wow embynta wei wow yahluti ya ki khon yong ka hapyrdi i dooh i duk. 

Ka thong yong u Ribait man ko kawa heh heiwa neini da thmu u wow pyndep ya ka HSSLC na ka CBSE lyngba ki skur wa em ha Shillong neitæ won yow pyrkhat u kayi ka laiñ wow lai puræ u. 

Share this:
Previous

Da pynbna ya ki 6 tylli ki chnong ha East Jaiñtia kam ki Containment Zone

Next

Ym toh u kdong yei stat du cha Shillong donhi: Lahkmen Rymbui