U CMD ka MeECL da pyntip u ynne ka sngi wa ka NEEPCO da bien ko wow pyndam noh yei pynduna bordiñ wa e cha ka jylla Meghalaya nadooh ynne ka 23 tarik iwa krehkaam nadooh 2 waje i sngi.
Kam wow pynkynmoo wa ka Load Shedding kawa katni toh kawa da sdang nadooh ka 20 tarik uni u bnai.
I daw wa da pyndooh bordiñ toh neidaw wym su ka MePDCL yaka poisa wa T. 369.26 klur ka bai bordiñ wa dang sah.
Neiliang ka MeECL da thoh ko leh cha ka NEEPCO wow pyrkhat ya kiwa yaleh Exam katni kamjooh leh neiliang u Montri ka chnat bordiñ da pyntip u wa da dep wow phah yaka poisa pyn haka 19 tarik wei chimpor 48 kynta yow ye u pyndep lut ya waroh ki kaam wa emkaam heiyatoh wa ini.
U Montri Rangbah leh da pyntip u wa i bhah wa ar ka ram wa yoh naka Atmanirbhar Bharat Abhiyan kawa palat T. 360 klur neibynta wow pynkhooid yaka bai bordiñ slem ko wow poi kamtæ da slem leh wow su.
