Jowai: U District Magistrate, West Jaiñtia Hills da pynmih hukum u ynne yow pyndam noh yaka hukum pynman Containment ya i yung wa i thaw yong Wiwo Siangbood, Rihun Kharbuki, Diamon Challam kiwa em ha Tpep-Pale, Jowai.
U District Magistrate da pyntip u leh wa da pyndam ya kani ka hukum hadien wa da yoh yaka Report naka chnat Health & Family Welfare Department, West Jaiñtia Hills wa da dep wow leh yei booddien ya kiwa em hei maa wow yoh ya uni u khñiang kamjooh wa da pyndep wow e sikai yow im deiwa myllien ya iwa thymme.
Chooh chooh u District Magistrate da pyntip u wa ka Village COVID-19 Management Committee, Tpep-Pale deiwa ya krehlang waka District Administration, Jowai Municipal Board wa u District Surveillance Officer u pteiñ ki wow booddien yei long i man kiwa chong ha kini ki yung.
Da phah leh ya kiwa chong ha kini ki yung wow bood ki thij yaki kyndon heiyatoh wa i chait i khiah wei ym toh wow noh roi ki ya i jhep, toh u bood katkam ki kyndon wa da booh deiwa ya krehlang wa ki bor chnong, ki bor District wa ki pulit.
Kam wow pynkynmoo wa da pynbna Micro Containment Area ya kini ki yung haka 6 tarik uni u bnai.
