Jowai: U District Magistrate, West Jainta Hills da pynmih hukum u ynne ka sngi wow pyndam noh yaka hukum pynman Containment Area wa da pynmih haka 6 tarik uni u bnai neibynta ka Dowell Petrol Pump, Rait Ladthadlaboh, Jowai wa waroh iwi i yung ka Harbiancy Lamar, KNB Road, Iawmusiang.
U District Magistrate da pyntip u wa da pyndam ya kani ka hukum hadien wa da yoh yaka Report naka chnat Health & Family Welfare Department, West Jaiñtia Hills wa da pyndep wow leh yaka Contact Tracing kamjooh wow e sikai kammon wow im deiwa kylla na iwa jooh.
Kini waroh hap ki wow ya krehlang wa ki jar jiar ki Village COVID-19 Management Committee kitæ ka Ladthadlaboh waka Tympang Iawmusiang yow pyntikna wa bood yaki kyndon wow yada na uni u khñiang.
