Ynne kawa man leh ka sngi wa ar wa pynman yakhih ka Dorbar Chnong Tympang Iawmusiang, neiliang u Waheh Chnong u E. Shylla da pyntip u wa da sangeh noh yei yakhih hadien wa da chah ka Dorbar Chnong Mupyut le bnai wow lai noh biang yei jhep ha Mynkjai.
Da pyntip u leh ha chwa ini da dep wow Phone cha u Waheh Chnong ka Mupyut deiwa kyrpaad ya oo wow em ki pyrkhat neibynta ini yow yoh biang u li noh ya i jhep neibhah kamwa man kattæ du deiwa noh-jhep ka Mynkjai iwa daw ye wow pynbait ya ini i kaam iwa man leh i thaw em hapoh u pood ka chnong.
Neiliang u Waheh Chnong ka Mupyut da e u yei kular wow pyrkhat biang ki yow e laad biang wow lai noh yei jhep ha Mynkjai.
Hadien ini da Phone u Waheh Chnong ka Mupyut uwa da khana wa da chah biang ki kamwa le bnai wow noh ya i jhep na Jowai ha Mynkjai.
Kamtæ neiliang u Waheh Chnong ka Iawmusiang da e khublei u ya ka chnong Mupyut kamjooh kiwa de ki chnong kiwa da pyrkhat yei eh ka chnong Jowai, deiwa pyntip leh wa daw lai cha Amlarem yow yaklam pynbait chooh chooh ya ini i kaam wei daw pyntip biang hajrong ini.
