Da pyndep ya ka Behdieñkhlam ka Raij Jowai hajrong ka yurim wow yakhun ya u COVID-19

Ka lehniam Behdieñkhlam 2021 ka Raij Jowai kawa man ka lehniam Soo Sngi Le Yaw, ynne ka Muchai da poi noh ko chawa kut ha Aitnar, Jowai heiwa da wan sakhi ya ka da u Chief Justice ka Meghalaya High Court, u Biswanath Somadder, u DC ka West Jaiñtia Hills, Garod LNS Dykes, SP West Jaiñtia Hills District B.D. Marak wa kiwi kiwi. 

Dang step ynne da pyndep chwa ya i Baam Tyngkong wa i Kyntiñ Khnong ha Yung Langdoh wei hadien ini ki khon ka Raij da lai pyndep ki ya ka Choh Thyndai wow e ngooh e dem ya ki Blai ki Syiem wow kyrkhu ki ya ki manyung hapoh ka Raij. 

Ha Aitnar hadien wa ki Khon Raij da tympat ki ya ka Symbood Khnong ki Kmai Raij, da pynhiar ya ki rong ki rot ha Aitnar kiwa klam hajrong ka khlam COVID-19 heiwa kammon wow yada na ka wei kamjooh leh ki kyntien lehkmen yei dap 75 ka Ri India wa 50 snem ka jylla Meghalaya.

Hadien wada pynhiar ki Kmai Raij ya ki ar tylli ki rot ha Aitnar ki Khon Raij (Chilliangraij) da pynhiar ki ya ka Symbood Khnong ha Aitnar. 

Related posts

Dei kreh yonglang pynkhreh ka Seiñ Raij Raliang ya ka Kopati Puja

November 17, 2024

Ha ka sngi pynkut ya ka Shad Nongkrem wan e kti u Lat ya ka aiñ Hima Khyrim Act, 2024

November 12, 2024

Manda dep pynhiar ya ka Symbood Khnong da sdang u pynhiar biang ya ki rot ha Aitnar.

Hadien wa da pynhiar ya waroh ki rot ki Khon Raij da pynhiar ki ya ka Khnong Blai heiwa ha kani ka kynti da elaad ya jar jiar ki chnong wow e-ngooh ki ya ka Khnong Blai katkam ka pali yong ki hapoh i pynlai u Dolloi, u Langdoh, u Pator wa kiwi ki Waheh Wasan kiwa kitkaam niam. 

Waroh ki rong ki rot kiwa da wanrah ynne ka sngi em ki 10 tylli. 

Ha i janmiet won da pyndep ya ka Datlawakor ha sarok Pohsawiar (nadooh Mynthong hadooh Madan Siatthong).

Ya ka Datlawakor, da yaleh hapyrdi ka dhab u Langdoh uwa yahkhmat ya ka Pynthor Wah wa ka dhab u Sangot Paswet uwa yah ya ka Pynyhor Neiñ heiwa kiwa jop deiwa ye u rah ya ka Lawakor (Ball Dieñ) cha ka phang yong ki daw rap hoi u kba ha ka pynthor yong ki. 

Ha kani ka yakhun Datlawakor da neh ko hadooh 19 minit heiwa da man ka yaleh kawa yoosuk wei hawa kut neiliang u Dolloi ka Elaka da e Wyrta u wa ka liang wa jop ha uni u snem toh ka Pynthor Wah wei da kitbok kitrwiang u leh ya ki khon ka Raij, ka Ri-loom Jaiñtia wa ka jylla ka ri kamjooh leh ka pyrthai waroh kawi.