Kamwa ki sngi ki tayaaw ka Chaad Niam Behdieñkhlam da jan poi ki hapoh ka Raij Jowai, ki chakri niam ka Raij leh da man kiwa ya boonkaam hei wow pyndep ya ki lehniam waphær waphær wei ha kani ka tayaaw da poi i por wow pyndep yei yong ka khang ka kah næ i kñia e ngooh e dem e bhet e bhar wa chisien chisnem ya Ki Blai Chnong Blai Raij.
Ya ki sarin yong kani ka lehniam da sdang nadooh ynnin ka sngi Mulong 30 tarik Naiynru da ka Dih Soopen ha Yung Langdoh neitæ ynne ka sngi Musiang ka 31 tarik da pyndep ya ka Kbai Mooknor katwa mynstep ka Muchai won i step u pyndep yei bhah i bynta ka khang ka kah ha man ki phang wa em ki Soodwar Sooluti deilang wa ya ka Tawiar Takan.
Ki Soo Dwar Soo Luti kynthup ki ya u Mookhai, Mootong, Mooralong wa Moosniang katwa ka Tawiar Takan won toh ka Wah Myntdu.
Hei sakhi ya ka Lehniam Kbai Mooknor wa da man ynne ka sngi hei yahkhmat u Dolloi kam u khlieh ka niam khlieh ka Elaka chirup u Pator, u Langdoh, ki Sangot, ki Wasan, ki Phrakur Phrakmai wa ki Waheh Wasian ka Raij da mih ki chakhmat ka Yaaw ka Syiem wow e Wyrta e chula hapyrdi kiwa wan yaaw wan haat wa kiwa chongdai wa da toh i por wow pyndep ya ka Lehniam Kñia Khang næ ka Kñia e ngooh e dem, e bhet e bhar ya ki Soodwar Sooluti wa ya ka Tawiar Takan kiwa man ki Blai Chnong Blai Raij wa da pynchong pynthiah nadooh wa sdang Ka Raij Ka Chnong deilang ki hukum adong niam.
Discussion about this post