Ynne i step Mulong ka 7 tarik u Naiynñiaw, kam chibynta yong ka lehniam Behdieñkhlam ka Raij Jowai, da pyndep ya ka Kñia Aitnar heiwa dang step ki Wasan dapoi ki ha Yungblai u Dolloi heiwa da em i ngooh i dem wei suit i choor chwa wow mih cha Yung Langdoh.
Kani ka Kñia toh wow e ngooh ya ka Syiem Aitnar wei man ko kawa kyrpang bha heiwa du manda pyndep ya ka u ye ki khon ka Raij wow lithooh ya ki Dieñkhlam na ki khloo ki kjam wow wanrah chapoh ka Yaaw ka Syiem ha Jowai.
Ya kani ka kñia da pynlut da pyndap pynbiang da u Dolloi hei wow e ngooh e dem ya ka Syiem Aitnar da ka syiar, ka blang wa ka dakha.
Neiliang u Dolloi ka Elaka Jowai, u Puramon Kynjing da ong u wa kani ka Kñia ynne toh wow pynkyntang ya ka Syiem Aitnar wei nadooh ynne ka sngi ymhoi de u psiah ha ka wow sait-kti wei ymtoh de wow pynemkaam ya ka um na ka kat hadooh wa wan hiar ka Dieñkhlam ka Bon na Khonraij wa ka Dieñkhlam ka Doh na Kmairaij.
Da ong u wa ki dak ki chin na ka Kñia heiwa ki Blai ki Syiem pynyoo ki ya ki dak wa i ki bru dang emkaam i wow booddien, wow pynbiang pyntoh wei kam kiwa pynlai niam kyrpaad ki ya waroh wow yaichah yow bichaar neibhah ka Niam em ko ha kti ki Blai katwa i kaamram wow pynbha em ko ha ki bru.
Discussion about this post