Katkam ka hukum adong u Trekirot, neiliang ki chakri niam ka Raij Jowai hei yahkhmat u Dolloi kam u khlieh ka Elaka, u Pator, ki Sangot, ki Wasan, ki Kñi na ki Phra Kur Phra Kmai deilang ki Soo Langdoh wa kiwi ki khon ka Niamtre na Raij Chyrmang, Raij Tuber, Raij Ialong wa ka Raij Jowai, ynne i step ka 23 tarik da pyndep ki ya ka lehniam kñia e ngooh wa chisien chisnem yow Syiem Pyrthat wa yow Mon Ryngklaw.
Ha kani ka step chwa wow mih na yung Langdoh; u Dolloi, u Pator, u Langdoh ka Langdoh, ki Sangot, ki Wasan deilang ki chakri niam ka Raij Jowai hap ki wow pyndep ya ka lehniam Pait Tpu iwa man neibynta u Dolloi, u Langdoh, ka Langdoh wa ka Raij ka chnong wei ka yurim yong kani ka Pait Tpu toh wow pynsabut hakhmat ka Dorbar Bru Dorbar Blai yei rukom krehkaam yong u Dolloi kam u Khlieh ka Niam, Khlieh ka Elaka, Ka Langdoh, U Langdoh kam ki chakri niam ka Raij wa kamjooh ka Raij ka chnong.
Hakhmat ka duwan ya kani ka lehniam næ kñia e ngooh da pyndep da u Sangot Paswet deilang i synraan u Sangot Pasubon wa u Sangot Pakynteiñ kiwa man ki Pateiñ Khon-Pateiñ Ksu ka kur Sookpoh Khad-Ar Wyrnai.
U Dolloi ka Elaka Jowai, u Wh. Puramon Kynjing hei yaklam da khana u wa ka lehniam man ko kawa hun Blai hun Syiem wei deiwa ye u pyndep hok ya ki sarin ka niam katkam ki hukum adong u Trekirot, yooluti wa ka Raij ka chnong kamjooh ka ri waka jaitbru u yoh ko yei kyrkhu khyrdoh ha waroh ki liang.
Discussion about this post