Jowai: Ka Dorbar Niam ki khon ka Raij Jwai hapoh i yahkhmat u Dolloi ka Elaka kam u khlieh ka niam wa ka Elaka ha kani ka sngi Hat ka 21 u Wisu 2020 i step ha ka luti ka yurim i sikai nadooh warim, da chim ko wow pyndep ya ka lehniam Thoh Langdoh kawa man kawi na ki lehniam wa nyngkong dooh yong ka Raij ka chnong heiyatoh wa ka Lehniam Behdieñkhlam.
Kamwa khana parom, chwa wow poi kani ka sngi Lehniam Thoh Langdoh, da kdar luti chwa da ka Kbai Mooknor heiwa u Dolloi, u Pator, u Langdoh, Ki Sangot, ki wasan waheh wasian ka Raij da mih ki chakhmat ha ka yaw ka syiem wow e Wyrta Chula najrong u Mooknor wa em ha Iawmusiang wa datoh i por i samooid wow sdang ka niam ka rukom hapoh ka chnong ka Raij wei nadooh kani ka sngi wymhoi de u rah Chyieñ ya kiwa yap na ryngkaw para chapoh ka raij ka chnong kamjooh leh napoh ka Raij ka chnong cha ryngkaw para.
Ya kani ka lehniam næ kñia e ngooh da pyndep ha Khloo Langdoh hei doh i pran wa em u Moo Langdoh wa man u Moo Niam wa da pynchong pynthiah katkam ki hukum ki adong Blai nadooh wa sdang ka chnong ka Raij.
Ka lehniam Thoh Langdoh deiwi i kyntien u ong, man ko ka lehniam wa pynyoo ka dak yei man kyrpang man kyntang i doh i pran ka Bei Rymaw Rymchit, neibhah katkam ka niam hapoh ka chnong ka Raij ha kani ka sngi ymhoi u leh ya iwon iwon i kaam wa pyntakha tadaiñ, pyntngit pynjngut næ pynjahklia yei doh i pran ka Bei Rymaw kamjooh leh ya kiyi kiyi kiwa em soodong talawiar yongka heiwa deiwi i kyntien datip leh ya kani ka sngi kam ka Sngi Sang Sngi, ka sngi kawa ki khon ka chnong ka thaw waroh emkaam u yaksohktilang ki hei wow pynkyrpang pynkyntang yei man i long ka Bei Rymaw ha kani ka sngi.
Heiyatoh wa kani ka lehniam yong uni u snem neiliang u Pa Dolloi ka Elaka Jwai, u Puramon Kynjin hei synraanlang ya oo da u Pator wow Langdoh da e wyrta ki wa da pynkyrpang pynkyntang chooh chooh ya ka lehniam ha uni u snem da i pynap Blai pynap Syiem wow lait ka chnong ka Raij, ka ri ka muluk nei maad i tynjooh yei yong ka khlam ka kjut wa wan ha kini ki sngi ha kylleiñ ki ri ka pyrthai kamjooh wow yoh ka chnong, ka Raij ka ri ka muluk yei chongsuk chongsaiñ wei roi i paar wa dap wabiang liang wanang.
Chooh chooh leh da e wyrta wa ha ka yurim wow yakrehlang wa ka sorkar wow yait u yada na kani ka khlam ka kjut wa yabi yong kani ka juk (COVID-19), ya ki program kiwa da booh thong u pynman ha kini ki sngi ki tayaw kiwa man hei pait i pynlai u Dolloi kam u khlieh ka Elaka- khlieh ka niam, da pynpep noh chwa ya ki chipor.
Discussion about this post