Ka Raij Chyrmang man ko kawi na ki Raij hapoh ka Elaka Jowai kawa pynman yaka lehniam Behdieñkhlam wei kani ka lehniam man ko kawa rap phær neibhah ki khon ka Raij du hadien wa pyndep yaka u ye ki wow hiar rep cha hali pynthor.
Ki lehniam katkam ki sarin ka Behdieñkhlam hapoh kani ka Raij da sdang ko nadooh ka 16 tarik uni u bnai.
Ynnin ka 26 tarik nadooh i janmiet hadooh wa che i step ynne da pyndep yaka Chaad Yung wei da jied yaki Rangbah Khynroo wow lai thooh yaka Charoh Blai kiwa man leh kam ki Dieñkhlam.
Ynne ka sngi da ye u pynpoi yaki Charoh Blai ha Chyrmang Neiñ kamjooh ha Chyrmang Wah.
Hadien wa pynpoi yaki Charoh Blai da lai Boh Synrum heiwa da lai ha ki laad ki dong ki kyntoit deiwa chaad chynrang wa kynthai chirup i kieh ka bom, ka bhuri, ka bikur waki chæng chæng wow boh ya ki nat dieñ da ki tre chken wei da tyngkheiñ ya ki.
Ini i Boh Synrum man i kam ka dak wow yada yaki khon ka Raij na i kjut ka khlam, i sih i roi wei wow poi i bha i miat salonsar waroh i jooh lang.
Discussion about this post