Jowai: Ka lehniam Chaad Behdieñkhlam yong ka Raij Kongwasan Chyrmang yong uni u snem da sdang ko nadooh ka Khyllaw ka 23 tarik wei da pynkut yaka ynne ka sngi Mulong 25 tarik heiwa da wan chimbynta da ki khon ka Raij najan najngai.
Da sdang yakani ka lehniam ha kini ki sngi wada dep dei chaad yung heiwa ki waheh wasan dalai ki cha ki yung ki sem hapoh i chnong i thaw wei da e ngooh e dem ki yei bha i miat ka yung ka sem.
Heijooh i por ki khon ka Chyrmang Wah wa ki khon ka Chyrmang Neiñ da mih ki yow thooh Dieñkhlam ki na ki khloo dep won tæ rah ki ya kini ki dieñkhlam chapoh chnong. Dep ki u rah ya kini ki Dieñkhlam da bood won sa ka li chaad yung hei janmiet.
Ha ka sngi khaddooh ynne ka sngi Mulong, da pynman yaka pynyoo rong næ ka rah ya ki rot cha Aitnar. Ya kini ki rot waroh da rah ha Aitnar yow yoo ki paidbah næ kiwa wan yoo ke, heiwa da chaad ki khon khynnah khynroo chynrang wa kynthai hei ood ki bom wa ki bhuri.
Ye u ong heini wa ka Raij Kongwasan Chyrmang hadien wa pyndep ko ya kani ka Behdieñkhlam da toh i por ya ki khon ka Raij wow hiar ki cha ki hali wow rep.
Ha uni u snem da em phra tylli ki rot, wada wanrah ha kani ka sngi hei sakhi u EMH Passah u Kñi ka Seiñraij Jowai kam u kongsan, u puramon Kynjing, Dolloi ka Elaka Jowai, u MLA warim ka War Jaiñtia u Lahkmen Rymbui wa kiwi kiwi.
Discussion about this post