Da pyndep yaka lehniam wa chisien chi rta u Pator ka Elaka Jowai ha Raij Ialong

U Pator ka Elaka Jowai ha kani ka 17 tarik da pyndep u yaka lehniam Ku Tyngkong ka yong oo hapoh ka Raij Ialong ha Yung Langdoh ka Raij Ialong.

Ha kani ka sngi da synraan lang ya u Pator wa u Dolloi ka Elaka, u Paramon Kynjin ryngkat wa ki waheh wasan ka Elaka deiwa emlang leh chirup wa ki Soo Langdoh.

Chwa u ku tyngkong u Pator ha ka Raij Ialong da lithooh ya oo da ki waheh wasan wa kit wa bah ya ka niam ka rukom ha ryngkat wa ki paaid ki phlang ki khon ka Raij Ialong, hadooh ka Raij Wahiajer ryngkat ka Raij Nongkhyllep.

Da lai yah ya u Pator ha Yung Ri Blai Ri Syiem ka Raij Ialong heiwa da yoh ya i ngooh i dem na u Langdoh, u Papiah ka Raij Ialong chwa u psiah hapoh ki pchem i dwar ka Yung Langdoh ryngat wa u Pator wa kiwa bood yong oo.

Hadien i ngooh i dem chwa u psiah u Pator hapoh Yung Langdoh (Ri Blai Ri Syiem) da Pynsait Kjat ya oo da ka Langdoh ka Raij Ialong ha u Moo Saitkjat wa da booh kyrpang ya u Pator ka Elaka wei da pynbood sa i biah phñiang ya oo wei ya i phñiang da chim na ka Kyllung Naar, wei da pynbood sa ka lehniam yeiwa da pyndep da ki Khynde Wasan ka Raij.

Related posts

Wow yoh i bha i miat pyndep ka Raij Mynsoo ya ka lehniam Behdieñkhlam

September 16, 2025

Da pynthymme ya kiwa krehkaam ka Dorbar Chnong Chiliangraij

September 16, 2025

Ya ka lehniam Ku Tyngkong yong u Pator man ko chisien rta bru kam ka dak wow pyntipmit ya ki Blai Ki Syiem, ki Lephaw Ryngkaw yong ka Raij Ialong. 

Da yoh leh ya ki kyntien kitbok kitrwiang ya u Pator na ki waheh ka Seiñraij Ialong wei da pynbood sa ki kyntien sneiñ kyntu da u Pa Dolloi ka Elaka, u Puramon Kynjin. 

Kani toh ka Wyrta na Genl. Secretary ka Seiñraij Ialong, u Juhhi Pale.