Ka lehniam wa khaddooh ya uwa yahkhmat ka Congress uwa man leh kam u Montri Rangbah warim ka Meghalaya, u Salseng C Marak da pyndep ynne ka sngi deiwa leh emburom kam ka State Funeral wa da pynman ha chnong u ha Resubelpara, North Garo Hills.
Kiwa yahkhmat na kylleiñ ka jylla wa kynthup lang ya u Montri Rangbah ka jylla, u Conrad K Sangma da wan ki wow pynyoo yei burom ha ka yalang wa da pynman ha Resubelpara Mini Stadium.
U Salseng C Marak da man u kam uwi na kiwa yahkhmat yei kaam seiñ saiñ pyrthai ha Meghalaya uwa da heh wei da khlaad noh u ha ka 16 tarik uni u bnai deiwa ban i kjut oo kattu katni por.
U Conrad K Sangma hawa e yei klam da pynsñiaw u yei sñiawsih wa da dooh noh ya uni uwa mihkhmat paidbah uwa da bna naam hei stat wei uwa yajan bha wa ki paidbah. Da ong u leh wa u Salseng kam u Chief Minister nadooh u snem 1993 hadooh u snem 1998 da wanrah u yei skem hei synchaar khadar deiwa ye u pyndep ya waroh 5 snem hanla em boon i eh i khoo iwa pynyoo yei rukom man u kam uwa yahkhmat.
Da kynmoo u leh yei yaklam u wa u Salseng uwa man u bru wa jem ktien, uwa leh khian wei u bru wa chemphang bha, kamtæ da ong u wa toh u kynmoo warom ya oo deiwa man kiwa krehlang yow tei wei pynwan dur yeiwa angnood u.
Da em leh ha kani sngi wa u Speaker, u Thomas A Sangma, u Minister ka chnat Education, u Rakkam Sangma, u Saleng A Sangma, MP, Tura Parliamentary Constituency, u MLA ka Resubelpara uwa man leh kam u Deputy Speaker, u Thomas D Shira, u MLA ka Mendipathar, u Marthon J Sangma, u MLA ka Songsak, u Mukul M Sangma deilang wa kiwi de ki MLA wa MDC kiwa da wan wow pynoo yei burom ki.
Da wan leh wow booh syntu neibynta u Lat ka jylla, u C H Vijayashankar.
Ya ka synduk da pynkup da ka lama ka ri kawa da e kti won cha u khon u Salseng, u Silman K Sangma wei yei metyap da lai tlep ha loom tlep-bru wa em ha Gajingpara.
Discussion about this post