I lehkmen College Week 2026 yong ka Kiang Nangbah Govt. College Jowai kawa da sdang nadooh ka 20 tarik hadooh ka 28 tarik u bnai March hei pait i pynlai ka Kiang Nangbah Govt. College Students’ Union (KNGCSU) da man ko kawa jop wei pynchongchit nadooh ki khynroo khyllood wa puræ kamjooh kiwa sikai, neibhah ka tayaaw lehkmen kani ka College ha uni u snem rap phær ko na ki snem wa da lai.
Ha uni u snem da yaleh ki u wanrah boon jait ki rynsan yow pyntikna wa waroh ki khynroo khyllood u yoh bynta lut ki, iwa man leh chibynta i burom ya jar jiar i sap wa em ha uwi pa kawi.
Ki jait rynsan kynthup nadooh ki yakob lehke Sports wapher wapher, i thoh Essay, thoh Poetry, Drawing, Quiz, Debate, Extempore Speech, i thoh Slogan, Spelling Bee wa kiwi najrong i chaad i rwai wa i yakob Miss wa Mr Kiang Nangbah Govt. College.
Neitæ katkam wa yah ka juk ka por da pynman haroh ki ka rynsan yakob Digital Platform e-Sports kam ka eFootball, BGMI, kamjooh ka yakob chondur Mobile wa i chna Reel.
Neibynta kiwa sikai da em ka yakob Musical Chair, Tunnel Ball, i pyndap um ha ki klong iwa da wanrah yei kmen i ka-it chongchit hapyrdi kiwa sikai wa kiwa lai puræ.
Ya kani ka tayaaw lehkmen ka Kiang Nangbah Govt. College da wan wow wai pyrda da u Montri ka chnat puræ puthi ka sorkar jylla, u Lahkmen Rymbui, katwa ha ka sngi pynkut won da wan emlang u Abhinav Kumar Singh, Deputy Commissioner ka West Jaiñtia Hills District.
Neiliang kiwa yahkhmat yong kiwa lai puræ kani ka College ong ki kamwa neiliang yong ki leh da yaleh chitom ki u lai luti yow wanrah yei ku ka College ha waroh ki liang, la heiyatoh i puræ puthi, i lehke Sport, næ heiyatoh i tei i chna wa kiwi, chim ki leh ka laad ka kabu wow e khublei kyrpang ya ka sorkar jylla hajrong iwa da chimkhia ko u wanrah i roi i paar ka College liang wanang yow ku ko ha ki liang waroh. Wei i jop yong i lai luti ong ki ymtoh deiwa jia hi-eh tangwa dei ya krehlang chirup chirup.
Da e khublei wei sñiawngooh haroh ki ya u MLA ka Jowai, u Wailadmiki Shylla uwa man leh u Montri sorkar hajrong ki yarap wei e mynsien yong oo ya ka College nadooh i e buit yong oo wow pynman ya ka yakob Dustbin Design Making wei kamjooh i e yarap yong oo Rs. 50,000 cha kani ka tayaaw lehkmen.
Discussion about this post