Ka Annual Sports Meet wa ar sngi yong ka Indian Catholic Youth Movement (ICYM), Jowai Diocese ya kawa da sdang ha ka 15 tarik da poi ko chawa kut ynnin ka 16 tarik hei wan sakhilang ki heh ka Balang wa kynthup ya u Lovely Shylla, Symbood Waheh Chnong Wahiajer kam u kongsan wa kiwi kiwi na ki Balang Katholik na ki Parish waphær waphær.
Ha ki ar sngi yong kani ka Sports Meet ki khon khynroo khyllood ka Balang na ki 18 tylli ki Parish ka Ri-loom Jaiñtia da wan chimbynta lang ki wow pynyoo ya ki sap wa em ki lyngba ki yalehke kam ka Athletics, Football, Basketball wa kiwi kiwi.
Ha ka yalang wa tbian ha ka sngi wa pynkut ya kani ka Sports Meet 2021, u Mutshwa Thabah, President ICYM, Jowai Diocese da e u ya ki kyntien pdiang burom ya waroh kiwa da wan ha kani ka sngi wa kiwa da chimbynta leh ha ki yalehke katwa u Lovely Shylla, kam u kongsan da pachat ya ki kyntien pynchlur wei wow e mynsien ya ki khon ka Balang.
Ki Parish kiwa da yoh wow rahnaam ha kani ka Annual Sports Meet kynthup ki ya ka Parish Umkiang kawa da jop ha ka Football deiwa pynrem ya ka Parish Lumchnong lyngba ka Tie-breaker, ka Jowai Parish kawa da rah yei naam ha ka Basketball yong ki kynthai deiwa pynrem ya ka Khliehriat Parish wa ka Jalaphet Parish da rah ko ya i naam Best Discipline katwa ya i naam yong kani ka Annual Sports Meet da rah da ka Mynsngat Parish kam ka Parish wa yoh boon Points dooh ha waroh ki yakob chynrang wa kynthai.
Ki arngut won ki khon ka Balang wa chkæh dooh ha kani ka Annual Sports Meet 2021 kiwa da yoh wow rah ya i naam Best Athlete toh ka Fatima Dkhar, Nangbah Parish na ki kynthai wa u Claminus Biam, Barato Parish na ki chynrang.
