Jowai: Ynne ka sngi ka skur St. Francis De Sales Secondary School, Bakur Dawki da pynkut ko ya ka lehkmen dap snem wa 25 yong ka ha ka yalang kawa da pynman ha pchem ka skur heiwa u montri ka chnat puræ puthi ka sorkar jylla, u Lahkmen Rymbui da man u kam u kongsan katwa u MDC ka thaaiñ, u Het Pohthmi da man u kam u symbood kongsan.
Ya kani ka sngi pynkut da sdang ko da ki kyntien pdiang burom na u Rev. Fr. Andrew Ashihe wa i ah ya u cake da ka Euginia Lamin.
Hawa e yei klam, ka DSEO ka M. Pde da ong ko wa kam ki bru emkaam wow yarap iwi ya iwi, lada em iwa bakla emkaam wow pynbait wei ini i pynbait emkaam wow leh nadooh wa khian dang khynnah. Da ong ko leh wa iwa kongsan tam ha ki bru toh wow em yei sñiaw wow pynbait pyn da i ya i hi.
Da pachat ko leh ya ki kyntien sneiñ kyntu ya kiwa sikai ka skur kamjooh leh ya ki manbei manpa.
U Pohthmi kam u symbood kongsan da ong u wa kani ka skur man ko i kyrkhu ya ka chnong kamjooh leh ya ki paidbah ka thaaiñ khappood.
Da ong u wa ha ki skur hawa e yei sikai emkaam wow man i sikai iwa pliah wa iwa miat neibhah lym kamtæ hi man i iwa eh wow yakhun wow yaleh wa kiwi tawon ki jaitbru.
Kam u kongsan ha kani ka sngi pynkut, u Lahkmen da e khublei u ya kiwa da seiñ ya kani ka skur kiwa da chynna jngai yei emkaam i stat i tip neibhah manda yoh yei stat toh u pynemkaam ki ha i dur wow yarap ya kiwi.
Da ong u wa i stat man i iwa emkaam hadooh kattæ wa ym em wa ye wow kyntait ki lada kiwa khayi pateiñ, deiwa e nongmuna wa ha kani ka juk computer emkaam wow pyndep boon ki kaam lyngba ki online transfer wei ya ka password næ pin ymye wow e cha kiwi katwa kamtæ da kyntu u ya ki manbei manpa wow phah ya ki khon cha skur.
Chooh chooh da ong u wa kam kiwa sikai namo ki bei ki pa emkaam wow tip yei sap wa em ha ki khynnah neibhah deiwa chem yei sap yong ki ye wow pynjanai yeitæ iwa ye won hadien wow pynkylla yei rukom im ki khynnah manda heh ki.
Da ong u “I stat sdang i na yung, neitæ na skur wei pynbood won sa ki soodung sookun (kam na ka chnong ka imlang sahlang),” kamtæ da kyntu u ya waroh wow embynta hei wow e yei stat i tip cha ki khynnah.
Ha kani ka sngi da e dorkhat leh cha u montri heiwa da kyrpaad na oo wow pynkylla noh ya ka kam ka Adhoc School.
Kiwi kiwa da klam ha kani ka sngi pynkut kynthup ki ya ka manbei Lahtympang Manners, u Chairman ka School Managing Committee, u Waheh Chnong ka Bakur, wa kiwi kiwi wei da pynphooh ya ka da ki chaad wa ki rwai na ki khynnah kani ka skur.
Ya kani ka skur da sdang ha ka 17 Naisan 1993 heiwa da tip ya ka kam ka Sacred Heart LP School heiwa ka Euginia Lamin da man ko kam kawa sikai wa nyngkong dooh yong ka wei da em du kamwa 20 ngut ki khynnah.
Ha u snem 2005 da ekti noh ya kani ka skur na ka Balang Chnong cha ka Parish Amlarem wei heitæ da pynkylla pyrtuid noh ya ka cha ka St. Francis De Sales Secondary School wei katni hapoh ka skur da em palat 300 ngut ki khynnah.
Discussion about this post