Jowai: Ka Bouncers Association of Meghalaya (BAM) toh ka seiñ yachemlang ki khon khynroo khyllood kiwa wan naki jait yalehke waphær waphær wei ynne ka sngi da kaap ko cha uwi won u moomer i lai luti heiwa da ye ko u pynkha yaka chnat ha Ri-loom Jaiñtia kawa tip kam ka Bouncers Association of Meghalaya, Jaiñtia Hills.
Haka yalang wa pynlai da u Sajeki Passah, Adviser ka BAM, Jaiñtia Hills; u MLA ka 2-Jowai Constituency u Wailadmiki da man u kam u kongsan, hei emlang u Deputy Commisioner ka West Jaiñtia Hills u Garod LNS Dykes, ka Phidelia Toi, u Puramon Kynjing Dolloi Elaka Jowai, u Joanstar Kharbuli President BAM, u Yoosar Kynjin President BAM, Jaiñtia Hills wa kiwi.
Kani ka seiñ man ko leh chibynta u wanrah yei yatylli, i yakrehlang wei heipor wa sdang ya kani ka seiñ boon hi toh kiwa dang puræ, wei wym pu em leh iwon iwon i yoojngai, ong u Joanstar Kharbuli President BAM.
Khana haroh u wa hadien i lai luti sñiawthooh won ki wym toh du kat i yachemlang, tangwa man haroh ka laad wow e khih e kreh yaki khon khynroo khyllood kam hei wow man kiwa sonteri haki chnat krehkaam waphær waphær kiwa e yada yaki bru samen wa kiwi.
Da ong leh wa hawa em ha kani ka seiñ, sikai ko leh yei akor burom neibhah man kawa kongsan tam wa ye u wanrah yei im wa sakhiat u bru, nalor wow ksoh leh yei por. Wei lada u bru ksoh makna u yei kyrdan wa heh katwon katwon leh, lym em won u i akor i burom katæ ka kyrdan yong oo pna hiar dor hi ko.
U Dolloi ka Elaka Jowai u Puramon Kynjing ong u, hawa pyrchang i u leh yeiwon yeiwon i kaam wow pynsuk ya idæ hap maad chiboon i eh i khoo, wei katwon tam man iwa eh neibynta ka imlang sahlang, kam hei wow pynku yaki khon ka thaaiñ waka jylla. Hanla kattæ leh yooluti u wa ki kaam yong kani ka seiñ u man i iwa pynkmen pynhun yaki bru.
U Wailadmiki Shylla da e yaroh u ya kani ka seiñ wa em ko yaka thong u pynchur yaki khon khynroo khyllood kamjooh leh u pynyohkreh khamtam ha kam kini ki por wa duna i yoh kreh sorkar.
Da e yumut haroh u wa kani ka seiñ toh u em ko i bynta e sikai khnang yow ye u pynpliah chooh chooh neibhah wa im i haka pyrthai yakob ha kawon kawon ka kaam.
Neitæ nalor wow man kiwa da yoh i sikai, katwon tam u sñiaw chngaaiñ chooh chooh lada yoh ki bru wow e yada næ synran da kiwa toh ki para doh para snam, pynrap chooh chooh u Wailadmiki.
Katwa neiliang u DC u Garod LNS Dykes da ban joor u hajrong i emkaam ka akor.