Khliehriat: U District Magistrate, East Jaiñtia Hills District da pyntip u wa kam chibynta wow pynkrehkaam ya ka Lockdown wow yakhun ya u COVID-19, ki BSF leh da chimkhia i wow yada ya u pood ka District uwa 51.320 Km wa ka Bangadesh khnang wow lait na i kaam khayi tooh wei wow khang yei psiah uni u khñiang na kani ka ri.
Neiliang ka BSF da pyntip ko leh wa waoroh ki thaw hapoh ka 97 BN toh kawa khlan yei khayi tooh ya ki masi wa kiwi ki mar dih pynmuaid, kwai, pathi wa kiwi kiwi khamtam hei miet iwa ye u ktah ya ka District.
Kamtæ khnang wow yada na u COVID-19 wei wow wanrah yei chongsuk da pynkrehkaam noh ya ka Section 144 Cr.PC chirup wa ka Regulation 3 of the Meghalaya Epidemic Diseases , COVID-19 Regulation, 2020 wow khang yei psiah i mih ki bru ha u pood ka ri (International border) dei thmu wow khayi tooh ya ki mar.
Chooh chooh da khang wow rah ya ki tiar pynmynsoo, kam ki tari, ki dieñ, petrol bomb, bomkala wa kiwi kiwi wa ye u pynemkaam pyrchah ya ki BSF iwa ye u pynthut yei chongsuk kamtæ da khang u lai ki bru dei kjat næ kari ha ki thaaiñ khappood hapyrdi 6:00 i janmiet hadooh 6:00 i step.
Da chah ya i lai i wan ki bru hapoh u pood ka ri neibynta wow thied mar-baam, thied tiar dukan, dukan PDS hapoh u pood ki chnong (India) nadooh 10:00 i step hadooh 1:00 i sngi katwa ya kiwa lai cha ka District Head Quarters namo wow thied mar wa emkaam wa ki mar rep ye ki u lai nadooh 7:00 i step hadooh 6:00 i janmiet.
Da kyntu leh ya ki VDP wow krehlang chirup wa ki chipai BSF wa ki pulit wow pynlai ya ki dukan dukdoh katkam ki hukum ka sorkar.
Chooh chooh daw chah du samen mo ar ngut na kawi ka manyung wow lai thied mar wa emkaam wei ya ki mar ymtoh wow dai palat yei dor wa da booh (MRP).
Discussion about this post