Shillong: U Symbood Montri Rangbah ka Meghalaya, u Prestone Tynsong da ong u wa ka sorkar ympu chah ko ya kiwa khih mylla kiwa em ha Ri Bhoi wa East Khasi Hills District wow liwan ki cha ki chnong deiwa pynrap leh wa kini ki ar tylli ki District da haap ki ha ka Red Zone namo kiwa em hei maa na u khñiang COVID-19.
Hawa yaklam wa kiwa pathai khubor, u Prestone da ong u wa hadien wa ka sorkar da pynbna ko ya ka East Khasi Hills kam ka District wa em hei maa na u khñiang COVID-19, ynne won da kynthup noh sa ya ka Ri Bhoi District neibhah wa em ka Bethany Hospital, wei kiwa mylla kiwa em katni ha kini ki District ympu yoh ki u liwan cha ki chnong yong ki.
Da pyntip u leh wa ka sorkar katni da phah liwan noh ko ya ki 382 ngut kiwa khih mylla kiwa neh ha kiwi tawon ki District cha ki chnong wa wan ki, wei neibynta kini da ekti ha ki bor ka chnat i chait i khiah ki District (DMHO) wa ki Deputy Commissioner wow leh yeiwa emkaam.
Da pyntip u leh wa kiwa mylla sngi emkaam wow pynsakhiat ki (Certified) wa ym em chah ktah ki wei ya kini ye u yoh na ki sahep ka DMHO khnang wow suk ki u liwan chnong.
Heiyatoh wa i pynyinsur ya ki kyndon ha ki 9 tylli ki District, neiliang u Prestone da pyntip u wa da sdang deiwa elaad ya kiwa mylla 100 sngi wow sdang biang ya ki kaam yong ki deiwa bood ya ki kyndon ki chnat ka sorkar.
Da pyntipu leh wa hanlada krehkaam ka Lockdown wa ini i pynyinsur, tangwa ymchah yei lai i wan hapyrdi ki District.
Discussion about this post