U Montri Rangbah ka jylla, u Conrad K Sangma da pyntip u wa i pynpsiah pyrtuid Online ya ki bru wa wan na baar ka jylla u sdang noh hadien kamwa 2 bnai, iwa man leh kam chibynta wow pynkrehkaam ya ka Meghalaya Residents Safety and Security Act (MRSSA).
Da ong u wa kamwa man katni ya ka MRSSA da pynkrehkaam ha ka jylla, hawa da booh leh ya ki Task Force Committee, najrong itæ da booh ya ki khyrdop (Entry wa Exit Point) ha Umling, Mendipathar, katwa ha Ratacherra wa Bajengdoba da sdang wow chna, deiwa pynrap wa ini da pynyoo wa da pynkrehkaam ya ka MRSSA ha ka jylla, wei ka sorkar ka chimkhia ko ya ini i kaam.
Hajrong ka MRSSA Amendment Bill kawa khlem pu yoh i mynjur, u Conrad da ong u wa i yaklam wa u Lat ka jylla kamjooh wa ka sorkar India dang lai ko, wei katwa dang lai i yaklam, ka sorkar ym em chong klikti ko deiwa pynkrehkaam ya ka aiñ wa da em chwa.
Heijooh i por u Montri Rangbah da pyntip u wa neiliang ki bor pynlai District da dep ki wow batai cha ka sorkar kammon i pynpsiah pyrtuid Online u krehkaam i, deiwa booh leh ya kiwa pait lyngba ki bor Internet ha ki Police Station, wei ki waheh chnong leh ye ki wow pynpsiah pyrtuid cha ki pulit ya ki bru wa wan sah wai na baar ka jylla. Da pyntip chooh chooh wa ka sorkar da phah ko leh wow pynbait ya ki kattu katni ki rukom krehkaam wow rap pynsuk ya ki paidbah wei hadien 2 bnai daw ye wow sdang noh ya ini i pynpsiah pyrtuid.
