Ha ka yaseiñ sngi burom ka Kynhun Balang Barit (KBB) wa haap hapoh ka Parish Namdong, wa da pynman ynne ka sngi ha ka Balang Catholic yong ka chnong Sanaro, West Jaiñtia Hills District, u Fr. Simeon Sungoh, Parish Priest ka Namdong Parish kam u kongsan yong kani ka sngi da pynkupbor haroh u ya kiwa ksohkaam thymme ka Parish Pastoral Council (PPC) wa kiwa ksohkaam thymme ka Kynhun Balang Barit (KBB).
Ha kani ka sngi da emlang u Fr. James Elizer Bareh, Asst. Parish Priest Namdong, u Fr. Manbha Pakem uwa pait ya ka KBB Jowai Diocese, najrong ki Sister wa ki paaid wangait ka Balang Catholic na ki chnong wa marjan.
U Fr. Manbha Pakem hawa klam e sikai wei pynsñiawthooh ya ki paaid wangait, ong u ka Kynhun Balang Barit (KBB) man ko kam i diñ wa khian bha neibhah wa dang man ko kawa khian, wei lada khoom chiboon ki dieñ ye u mih ka thylliej diñ waheh wa e i chit ya kiwa boon walang.
I jooh hi man ha ka Kynhun Balang Barit leh wa lyngba i thylliej diñ yong i maya, i duwai, i ya kyrchaan iwi yeiwi han man iwa khian leh man won iwa khlan.
Wei deiwa ya embyntalang ha kani ka kynhun ye u lai chakhmat wei lai luti jngai yow pynchit pynchngaaiñ ya ka Balang waka imlang sahlang hi waroh kawi.
Pynrap haroh u deiwa ong hei im hanla boonsien chem i boonjait i eh i khoo, i jinjar i chitom leh, tangwa toh u kynmoo i wa ka ktien u Blai e ko i kyrmen hei im kitu kiwa puræ ya ka ktien u Blai.
Chwa ini da em ka Mass Wakhooid wa yahkhmat da u Fr. Simeon Sungoh Parish Priest ka Namdong.
Hadien ka Mass da yoh ya ka yaseiñ nohchariñ sngi wei da yoh i klam wei kyrkhu na u Deacon Richard Shylla, wei da pynkut won dei chaad pynemburom na ki kynhun KBB, i saam Prize cha kiwa yoh nyngkong wei wa ar ha ka yakob wa da leh ha ka sngi chwa.
Discussion about this post