Ynne ka sngi ka H.K. Singh Memorial HS School, Jowai da pynman ko ya i pynkupburom ya ka ki khynnah yalehbol yong ka ki wow mihkhmat ya ka jylla ha ka lympung yalehke Under-14 Subroto Cup ka wow man ha New Delhi wa ha Bengaluru nadooh u Naikhynde hadooh u Naichiphaw uni u snem.
Ha kani ka sngi u MLA ka Jowai Constituency, u Wailadmiki Shylla da man u kam u kongsan katwa ka DSEO ka West Jaiñtia Hills, ka A. Syiem da man ko kam ka symbood kongsan.
Ka A. Syiem hawa e yei klam da sñiawkmen ko wow emlang ha kani ka sngi wow pynkupburom ya ki khynnah kiwa daw mihkhmat ya ka jylla wei kiwa da rah burom ya ka District waroh kawi.
Da ong ko leh wa ki khynnah wow mihkhmat ymtoh u artatien namo u sarom ki tangwa emkaam wow em ki yei akor salon ha kiwon kiwon ki bynta kamjooh wow bood sarin ya ki kaam wa da booh ki ha ka chi sngi.
Da kitbok ko leh ya ki khynnah wow yakhun bha ha nongbah Delhi wei wow wanrah biang ya i naam jop cha ka jylla wa ka District.
Kam u kongsan ha kani ka sngi, u Wailadmiki hawa e yei klam da ong u wa sñiawkmen u yeiwa ku ki khynnah ha ki kaam yalehke wei da dap u dei kmen wa jop kani ka skur wow mihkhmat ya ka jylla deiwa pynrap wa emkaam wow man kiwa jop ha ka ri waroh kawi.
Heijooh i por da ong u wa ympu em kawi wot ka skrur na ka jylla wow jop ha ka ri, deiwa kyntu ya ki khynnah wow tia chaphrang wow man kiwa pynchkeh neibhah ki thaw cha baar jylla man ki kiwa rap phær na i.
Chooh chooh da ong u wa kam kiwa mihkhmat eh u wow yaklam wa ka sorkar heiyatoh wa i emkaam ki skur hawa duna ya ka Pass Percentage.
Da ong u leh wa emkaam wow man kiwa dohyap ha kiwon kiwon ki kaam la ha yung wot cha lait khnang wow wanrah ya i burom ya ka jylla wot ya ka ri.
Da kyntu u leh ya ka skur wow man kiwa e laad ya ki khynnah wow pynyoo ya ki sap wa em ha ki.
U Wailadmiki da pynbna u wa nadooh uni u snem kiwon kiwon ki skur wa mihkhmat ya ka jylla cha ka Subroto Cup na ka Jowai Constituency u e u T. 1 lak.
Ha kani ka sngi da yoh leh ya i klam na u Principal ka skur, u T. Passah uwa da e ya ki kyntien pdiang burom, i klam na ka khynnah skur ka N. Passah wei ya ka yalang da pynlai da ka Hamya Shylla wei da yoh leh i ngoohblai na u R. Suting wei da yoh ya ki kyntien khublei na u Sienmitre Sumer.
Puræ leh: Jop ka H.K. Singh Secondary School ya ka U-14 ka Subroto Cup 2023 ka Meghalaya
Discussion about this post