Kam chibynta i lehkmen yoh laitlooid wa 75 snem ka ri iwa ha uni u snem da e pyrtuid kam ka India@75 “Azadi Ka Amrit Mahotsav”, ka chnat Arts & Culture ka sorkar Meghalaya deiwa ya krehlang waka Meghalaya Model United Nations ynne ka sngi da pynman ki ya ka yalang wow pynkup burom ya kiwa jop ya ki yakob wa boon jait wa pynman Online da ka Meghalaya Model United Nations, ha ka yalang wa pynman ha Ramakrishna Mission Vivekananda Cultural Centre, Shillong heiwa u F R Kharkongor, Commissioner & Secretary, Department of Arts & Culture da wan u kam u kongsan.
Kam wow kdaw heini wa da em 562 ngut kiwa da chimbynta na ki 11 tylli ki District ka jylla kiwa da chimbynta ha ki 9 tylli ki jait yakob; Fancy Dress, Debate, Art, Feature Writing, 3D Illustration, Time Capsule, Poster Design, Quiz wa Photography.
Hawa e yei klam, u F R Kharkongor da yaroh u ya ka Meghalaya Model United Nation kawa da pynman ya kini ki yakob hanla em ka khlam, ka Meghalaya MUN da man ko kam kawa hakhmat dooh wow e rynsan ya ki khynroo wow pynyoo ki ya ki sap yong ki.
Hawa e khublei ya kiwa jop ha kini ki yakob, da ong u wa ha waroh ki jait yakob lada jop la rem leh, iwa emkaam toh wow man kiwa tip iyi iyi wa thymme manda chimbynta. Da pynchlur u leh ya kiwa chimbynta wow pyrchang ki wow yaleh u pynpliah chooh chooh yei sap wei wow pteiñ wow tip wow chem yeiwa thymme yow pynbha pynmiat ya ka jylla wa ka ri waroh kawi.
U Kharkongor da ong u leh wa kini ki yakob man ki kiwa yahaap bha waka lehkmen dap 45 snem i yoh laitlooid ka India wa i dap 50 snem ka jylla Meghalaya.
Kiwi de kiwa da emlang ha kani ka sngi toh u Swami Hitakamananda Ji Maharaja, Secretary, Ramakrishna Mission Shillong, u Meshuwa Kupar Mawthoh, President, Meghalaya Model United Nations, u Ritwick Bhuyan, Executive Director, Meghalaya Model United Nation waka Cathreenia Nongkynrih, Secretary General, Meghalaya Model United Nations.