I yakhih wa khlem booh por namo ka Indefinite Strike yong ka Jaiñtia Hills Truck Owners Association (JHTOA) kawa da sdang nadooh ka 6 tarik uni u bnai pyrchah ya ki karkhana pynmih khyndaw-bilat wa em ha East Jaiñtia Hills ynne ka sngi da rai wow pynkut noh ya ka hadien wa ki karkhana hapoh ka lama yong ka Jaiñtia Hills Cement Manufacturers Association (JHCMA) da rai ki wow pdiang noh ya i dawa ka seiñ ki tre truck.
Ynne ka sngi da pynman ya ka yalang ha Takhniang, Tuber East Jaiñtia Hills heiwa da wan chimbynta ha ka da ki dkhot ka seiñ wa kamjooh leh da ki tre truck na kylleiñ ka Ri-loom Jaiñtia.
Hawa yaklam wa u President ka JHTOA, u Nidamon Chullet da ong u wa ynne da rai wow sangeh noh ya ini i yakhih hadien wa da pdiang ki karkhana ya i dawa ka seiñ.
Da e khublei u ya ka sorkar hapoh i yahkhmat u Montri Rangbah ka jylla, u Conrad Sangma wa da chimkhia u ya ini i kaam hadooh wa poi ynne ka sngi wa da yoh yeiwa dawa i wow myntoi ki paidbah wa ki tre truck, da e khublei u leh ya u Montri warim ka chnat Transport, u Sniawbhalang Dhar uwa da pynmih ya ka hukum wow pynthymme ya ka bai kit mar ki truck kawa T. 7 chi Ton chi Km.
Chooh chooh da pyntip u wa ynnin da chong pynbait wa ki karkhana chirup wa u DC wa u SP ka East Jaiñtia heiwa da rai wa ya iwa yaklam daw soi noh da ka soskular wow pyntikna wa ym kylla ktien de ki karkhana heiwa ki karkhana wa ka JHTOA leh u yachem ki man la u bnai heiyatoh wa ki kaam yong ki.
